其實搵到啱Key嘅同事真係好難得，我喺呢間公司就有幾個同事可以推心置腹，大家未必同一個部門，但係公事上會互相幫忙，私底下亦成日出去飲嘢食飯。
我哋幾個男仔都係嗰啲好易話為嘅人，例如我以前讀書經常打羽毛球，可惜畢業之後舊同學各有各忙，身邊啲friend又唔鍾意打，搞到荒廢咗好耐，點知我講完一次之後，嗰幾個同事就主動book場，未有疫情前每個禮拜梗有一晚會柴娃娃去打波，呢啲日子真係好開心。
而家冇咁開心唔係因為體育館關閉，而係我同其中一位男同事疏遠咗，呢度稱呼佢做Ray，本身我同佢好friend，係成班人當中特別再投契啲，雖然佢喺公司比我高級，亦係隔籬team個leader，但可能工作上冇利益衝突，大家反而無所不談，其實Ray都係大我7至8年，有時覺得佢好似大哥哥一樣，我之前失戀都有同佢呻過。
Ray嘅外型有啲似一個叫黃嘉樂嘅藝員，不過就成熟啲，佬味重啲，有晚大家打完波食糖水，各同事四散後得返我哋兩個同路，Ray突然好認真向我表白，原諒我唔想憶述當中細節，因為for我嚟講真係接受唔到，亦唔想再講返，總之Ray就話自己係鍾意男仔，希望我可以畀個機會，嘗試同佢喺埋一齊。
唔識點形容，但我百份百鍾意女仔，hehe冇諗過，亦唔想諗，我承認當時係覺得難頂，如果佢輩份方面唔係公司嘅senior，而係年紀相若嘅平輩friend，我估自己應該爆咗粗。呢句絕對冇歧視成份，亦唔抗拒同鍾意男性嘅男人做friend，只係發生喺自己身上真係唔得，所以我當晚就以講笑方式打圓場，係咁叫阿Ray唔好玩，佢係一個好識做嘅人，冇迫我表態，亦冇繼續講落去。
之後喺公司嘅日子，我同Ray見到面就尷尷尬尬，以前一見到就講笑傾計，而家頂盡係點下頭，成班男同事約放工食飯，由於我唔想轉變咁大，驚其他人會奇怪，所以照常出席同事飯局，點知反而係阿Ray不斷缺席，佢次次都話多嘢做join唔到。
唉，我都唔知佢係嬲我，定係純粹佢自己覺得瘀，一句講晒，而家個氣氛怪到離譜，我諗自己喺街撞返前女友都冇咁尷尬。
我都曾經爛蒲爛玩，同初相識啲女one night stand冇問題，就算對住唔鍾意嘅女，我一樣可以同佢哋搞嘢，但男人真係唔啱我，唔得唔得，加上從未試過有男性向我表白，真係唔識得點樣同阿Ray再相處。問心嗰句，我係覺得好可惜，同事之間好難咁friend，男仔同男仔都未必一定啱玩啱傾，而家因為咁而好似冇咗個老友，真係有少少難受。
投稿：羽毛球界巨根
＝＝＝
❤️ 講開呢個主題，睇返一篇開心啲嘅舊文，來自情侶座。
《個女帶另一半返屋企食飯，而另一半係個女仔》
https://hkofficedaily.com/?p=2530