3月中經獵頭介紹去見份工，in完第二日被告知唔適合，咁冇辦法啦！點知幾日後我收到呢間公司電話，個HR同我講：「想你4月頭返工，有冇問題？」
咦！獵頭唔係同我講落選咗咩？咁可能係間公司改變主意，又或者有其他求職者拒絕offer，退而求其次選擇咗我啦！
我：「4月頭ok呀！」
HR：「Good！咁你唔好同獵頭嗰邊講喎，你有冇LinkedIn嗰啲嘢㗎？記得唔好update，起碼半年後先。」
我：「點解呀？」其實我當時係諗，唔通呢間公司同個獵頭鬧翻？但原來一切比我想像中更cheap！
HR：「Budget問題，如果你同獵頭講，我哋經佢請人就要畀commission，最緊要你自己搵到工啫，總之你保密啦！」
然後……我拒絕咗。
易地而處去諗，呢間公司想請人，搵獵頭張羅篩選，約完求職者上嚟interview就收集個人資料（因為我上去都要填form），再私下聯絡叫返工，嗌埋求職者幫手呃獵頭，說穿了真係非常無品，或者今次我係既得利益者，但之後呢？做咗你哋staff，點知仲有咩陰濕嘢要防範？
何況我打份工啫，又唔係撈偏，咁都要收收埋埋？LinkedIn唔update事小，因為我冇用，不過將來再搵工呢？成世都孭住個咁無謂嘅大話做人？你唔想畀commission咪唔好用獵頭，自己出job ad請人囉，連出招聘廣告嘅錢都想慳，又用埋晒啲旁門左道，呢間公司真係做得過？
我驚個獵頭白做，所以講咗出嚟喇，佢哋自己處理啦！
成世仔最型係今次，不過又要繼續搵工