真係好想問下大家，作為一個仲未辭職嘅求職者，如果headhunt打電話畀你，你會希望佢咩鐘數打嚟呢？Office hour有人唔鍾意，放咗工先打去又唔like，有次我更加係凌晨兩點收到求職者call back，而家仲要識埋暗號，暈！
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
我：「喂，你好呀？請問係咪Daniel？我叫Priscilla，收到你份resume，想同你講下份工，而家方唔方……」
「HKTVmall？而家屋企冇人呀！」對方仲要好大聲，我耳膜都差啲穿。
我：「HKTVmall？唔係唔係，我係獵頭公司嗰邊打嚟，你send咗resume嚟關於嗰份……」
「你6點後再送嚟啦！邊有人同你收呀！6點半啦，6點半屋企應該有人㗎喇，預鬆啲，邊有人office hour送貨㗎，搞咩呀HKTVmall！」
跟住佢cut咗我線。
牛頭唔搭馬嘴，完全唔知咩事，但因為頭先嗰句「HKTVmall？而家屋企冇人呀！」太大聲，隔籬位個同事聽到少少所以問我做乜：「個求職者咁嬲嘅？你介紹咩工畀佢？」
我：「吓！我出post，佢自己send CV嚟㗎喎，咁我咪打返畀佢囉，唔知係咪收得唔好呢，佢猛咁話我係HKTVmall，又話6點半屋企先有人收貨，唔通我打錯電話？」
同事：「哦！佢應該畀緊暗號你，叫你6:30先再打去，肯定而家喺office唔方便講啦！」
唔係啩，玩到咁複雜？結果我6:30打去，又真係咁喎！
我：「Hello，係咪Daniel？我叫Priscilla，獵頭公司嗰邊，晏晝打過畀你㗎！」
「記得記得，就係等緊你電話，頭先唔好意思呀，老細喺正我側邊，佢疑心好重㗎，我唯有扮你係HKTVmall送貨。」
其實我唔知佢咁講會唔會被拆穿，因為我都用過HKTVmall買嘢，好少會咁樣call人，通常係WhatsApp個message，希望佢老細冇識穿啦！
後來我又遇到一個差唔多嘅case，嗰次係女求職者。
我：「喂，你好，請問係咪Amy？」
「係呀，邊位？」
我：「我叫Priscilla，收到你份resume，想同你講下份工，而家方唔方便？」
「今晚食飯？好呀，你想幾點？」
我：「食飯？我係headhunt，關於個Account Manager嘅position。」
「冇問題呀，8點好冇？尖沙咀K11？」
我：「Sorry，你係咪而家唔方便講嘢？」
「係呀係呀，咁你book位啦，二樓嗰間吖嘛，先到先等吖！」
我：「得，明白，咁我今晚8:00再打嚟。」
8:00我都放咗工，我就真係約咗朋友食飯喇，仲要特登save低佢個number，因為8點後我用唔到公司電話吖嘛！點知8:05打去都要畀佢鬧：「等咗你好耐呀，晏晝你又話聽得明嘅？個Account Manager嘅position點㗎？你而家講啦！」
呢位Amy正常時間聯絡到都還好，試過打畀另一位求職者，對方冇聽，咁我咪留言囉，另外仲有add佢WhatsApp道明來意，希望佢唔方便聽電話都可以用message回覆我，WhatsApp又show埋我私人號碼呢，盡量方便求職者啦！點知全日都冇動靜，咁我就冇擺上心，估唔到凌晨2:00收到佢call back，係凌晨2:00呀！」
「Hello，你係Priscilla？我收到你留言同埋WhatsApp呀，唔好意思而家先打返畀你。」
我：「唔緊要，咁啱我仲未瞓，你係咪去咗旅行呢？有時差？」
「唔係去咗旅行，我而家先放工咋，已經即刻覆返你。」
我：「嘩！放凌晨兩點，你文職嚟咋喎！咁真係要諗諗轉工喇！」
「係呀，真係頂唔順，如果之後真係有得去interview呢，你個客可唔可以約夜晚8, 9點呀？我請唔到假，office hour肯定見唔到工，又或者朝早8點前去interview都得，唔好意思呀，你幫我問問吖！」
搞唔掂喎！有得必有失，你唔抽時間去見工，又點可以離開而家呢份收凌晨2點嘅公司呢？
有時我都會揀office hour以外嘅時間打畀求職者，但一樣畀人鬧到一面屁……
「你傻㗎！而家幾多點呀？」
我：「7點……」
「咪係囉，你知唔知放工後係我嘅私人時間？你聽日早啲再打過嚟啦，我揸緊車呀！」
喂，點㗎！早又唔得，夜又唔得，不如喺份resume裡面註明想幾多點收電話啦，大家又希望獵頭幾點 call你呢？咩鐘數先至最適合？(完）