無須扭曲自己 你若盛開 蝴蝶自來

最近對老公有啲不滿,又有啲心痛,因為佢轉咗新工之後,晚晚返到嚟都成身煙味,個女以前會撲上去攬實爸爸,而家都放棄咗,早兩日我又忍唔住坐低同佢認認真真討論。

老公不嬲唔食煙,拍拖嗰陣睇住佢同老爺因為食煙問題而多次鬧交,有次新年買禮物上去拜年,老爺講笑話啲嘢唔等使,不如送條煙畀佢仲實際,我老公聽完之後火都嚟埋,拜年變開年,呢啲事我仍然印象深刻。

明明咁憎人食煙,點解而家自己又晚晚成身煙味返屋企呢?老公之前解釋過,自己冇食,不過班同事食,為咗合群所以跟大隊去「呼吸」,佢仲話有另一位同事都係唔食煙,照樣跟埋去傾計,因為唔埋堆會聽少好多嘢,亦會同其他人有種疏離感喎!

其實老公轉咗呢份新工大約9個月,呢間公司年中曾經裁員,佢話有心理陰影,當時佢好似獨家村咁,原來好多人一早收到風會cut人,而自己就完全冇聽聞,後來仲發現被裁嘅3位同事都係比較自我,所以之後就想合群啲,又話食煙班人當中,有幾個都係話得事嘅中高層。

我:「老公,我明白你嘅擔心,不過真係要跟埋去食二手煙先叫做合群咩?你睇下阿女而家……」

「我知,所以每晚返嚟我都第一時間去沖涼換衫先敢攬佢。」

我:「你以前最憎老爺食煙㗎喎!」

「嗰個係我阿爸,點同呢?我想佢身體健康吖嘛!而家呢班同事又唔係我親人,總之費事同啲人咁有距離啦,佢哋喺office就好忙,係煙break先傾到下計咋。」

我:「如果你做到嘢,唔會無啦啦有人排斥你,更加唔會無啦啦話裁員炒你啦!」

「有時啲嘢唔係咁計㗎,死做爛做成隻牛咁冇用㗎,人際關係好重要。」

已經唔止一次討論呢個問題,但每一次都冇答案,有時會驚老公偷偷地食埋一份,我對煙味好敏感,肯定之前佢冇食,所以無論一手定二手,搵食艱難都唔需要扭曲自己去將就。

老公返呢份工之後唔單止周身煙味,連應酬都多咗,而家禁晚市先正常放工返屋企咋,之前佢每個禮拜有兩至三晚會出去飲嘢,又係公司嗰班人,根本佢就好討厭酒吧呢類咁嘈嘅環境,為咗要同其他人拉近距離,連個人喜好都改變埋,我睇得出佢身心俱疲,所以作為老婆唔係想詐型,只係想畀佢知道合群唔需要咁,坦白講佢都唔enjoy啦!

我自己公司個department有個女仔都係咁上下,人哋去廁所,佢又去廁所,但入到去佢又唔係小便㗎喎,整整頭,照照鏡,同我哋傾兩句就跟住出返去,後來有人發現,只要department裡面咁啱有兩個或以上嘅女同事一齊去toilet,佢就一定會跟埋嚟,唔使咁喎,呢啲係小學生嘅行為,小個便幾分鐘講是非都唔夠啦,點解唔做返自己呀?

合群絕對冇錯,人脈同關係網喺職場上好緊要,但正正常常就得㗎喇,唔需要扭曲到自己變晒形,而且性格係天生,有啲好動嘅人真係逢show必到,咁係因為佢哋發自內心享受,如果性格本身唔係咁,點解要迫自己承受呢?

時間呢樣嘢好公平,無論係李嘉誠定係普通人,每個人每一日都只係得24個鐘,你將時間用嚟迎合別人,咁屬於自己嘅時間就一定會少咗,所有嘢都係有得有失。

合群分兩種,一種係情願,一種係不情不願,做自己可能升職冇咁快,加薪冇咁多,但起碼開心自在,如果唔跟埋去食二手煙就叫做唔合群,將來第一個炒你,咁呢份工要唔要都罷啦,我寧願老公健康啲,有真本事始終會搵到食,你若盛開,蝴蝶自來。

傳統話年廿八洗邋遢,我哋屋企太亂,一早已經開始打掃同埋丟棄冇用嘅嘢,但其實新一年最需要丟棄嘅係無效社交,因為生活雜亂無章先至係最困擾。

error: