溝唔到就踩其實係好無知─情侶座

朋友個阿叔一直搵唔到香港女士拍拖同埋結婚,最大原因除咗外型,仲有性格同埋一啲壞習慣,例如去茶記都要對侍應呼呼喝喝,40幾蚊個常餐叫人牛扒同麵分開上,又話要7成熟🤦🏻‍♂️,我親眼見識過,因為嗰次佢阿叔話想join speed dating,我哋3個人喺茶記見面,最後我求其搵個藉口推卻。

外型就唔講喇,各花入各眼,淨係記得佢阿叔最後趕住走,因為要去入錢賭馬。

一直識唔到香港女士,搞到佢阿叔對港女非常有偏見,強調全部都係貪錢、貪靚、唔識煮飯、懶、講嘢寸,又話香港啲女仔淨係睇你有冇車有冇樓。

不過咁,佢阿叔總算爭氣,真係冇娶到港女,輾轉經朋友介紹之下同一位國內女子拍拖,唔夠幾個月就結婚,申請埋對方嚟香港。

最初的確有一段蜜月期,後來老婆問佢拎咗筆錢搞美甲生意,搞搞下唔知喺邊度識咗第二個男人,老婆搬走埋,而家辦緊離婚手續。

唔係要區分邊個國家嘅女士好啲,任何地方都有好人同壞人,男女都一樣,溝唔到就踩,其實好偏頗同無知。

我一直好想同佢阿叔講句:「其實港女唔需要你啲錢,唔需要你架車,唔需要你層樓,因為港女根本唔需要你。」

error: