消費券一出群魔亂舞，同事個爸爸噚日喺街畀人拉咗入舖頭，耗盡消費券嗰$2000買咗三樽石斛粉（IG嗰邊有圖），另外仲要補貼幾百蚊，由於70幾歲老人家身上冇咁多現金，最後要call仔女嚟找埋尾數。根據同事形容，嗰間賣石斛粉嘅所謂舖頭只係臨時舖，即係今個星期賣電話殼，下個星期賣BB衫嗰種。
我自己weekend出去嘅時候都發現多咗奇怪舖頭，記得有間大大個牌寫住「買嘢可以用消費券」，嗰間舖一忽賣奇奇怪怪口罩、一忽賣不知名面膜、一忽賣鬧鐘，全部嘢都係拼拼湊湊，我哋後生一輩相信唔會中伏，但好似同事爸爸嗰啲老人家真係好易中招，啲店員仲要行出嚟拉佢哋入去。
除此之外，幾個長輩都話身邊有人係咁叫佢哋買營養品同埋藥之類，一直強調可以用消費券，但係連舖頭都冇，唔知啲不法之徒用咩方法可以扣到人哋嘅消費券，好在呢班長輩都冇中伏，大家要提醒屋企嘅老人家小心啲。
講到明群魔亂舞，牛鬼蛇神又點止咁少，好多人都發覺有商舖喺8月1號或之前幾日暗暗加價，無論係電子產品定係日用品，有明眼人發現商家早有準備mark up晒，就連食肆都一樣，相信係疫情影響太大，個個都瞄準消費券要賺返筆收復前失。
有唔少人話8月1號去買嘢畀舖頭劏，如果明碼實價其實你情我願，除非對方有隱藏收費，否則唔怪得人，但最恐怖係有商戶陰陰濕濕收多你錢，已經有網民話去食嘢嘅時候，埋單先見到餐廳另外收一項「消費券手續費」，所以大家畀錢嗰陣記得記得要check單。
街頭陷阱避得過，Office嗰啲呢……
有朋友公司發生咗一件事，話說佢入職一年以嚟，上司從未同過佢食飯，當日連welcome lunch都冇，不過噚日個上司就罕有地拉大隊出去食lunch，已經有同事話4人一枱好難成班一齊食，何況department有成10個人咁多，但係上司一意孤行，仲話分三張枱食都冇問題。
佢哋成班人都覺得奇怪，不過食個lunch又冇咩咁大不了，所以焗住照去，埋單嘅時候上司爭住畀，原來係想用咗啲消費券，再叫大家夾返cash出嚟，嗰餐一人平均$200，本身啲同事就食開茶記幾廿蚊set lunch，而家無啦啦要走去食「豐富午餐」，雖然$200唔係天文數字，但上司用呢招兜個圈套現就肉酸啲囉。
消費劵發放嘅頭幾日已經咁多古靈精怪嘢，嚟緊肯定仲多，大家要睇實自己同埋屋企人啲錢呀！
講起騙局就諗起呢段文，因為當時唔係出喺辦公室日報，可能有讀者未睇過 。
《電話騙局都唔好咁求其吖－－－聶瞳》
https://hkofficedaily.com/?p=10308