見工，三個人in我，一個係HR妹妹，另外一個男人係經理，仲有個女人（我都唔知佢咩title同身份），連埋我4個人坐喺會議室，當我Self-introduction之後，男經理就即刻鬧個HR妹妹仔。
經理：「我咪講咗要五年經驗囉！」個經理明顯冇睇過我啲資料背景，真係interview嗰一刻先研究我份履歷。
HR妹妹仔：「佢第一份兩年，第二份都係兩年，上一份三年……」
經理：「唔係加埋呀！你睇返佢前兩份係唔同行業㗎！咁呢度即係得三年經驗囉！」
HR妹妹仔：「Sorry，我以為五年經驗係加埋……」
經理：「你以為呀？咁幾時到我以為呀？」
HR妹妹仔開始眼濕濕：「唔好意思，下次會睇清楚。」
經理：「點樣唔好意思呀！我black and white寫晒啦，你究竟有冇睇㗎！」
HR妹妹仔：「對唔住呀！我下次會注意。」
經理：「而家唔係講對唔住嘅時候呀……」
我真係忍夠，自己起身同佢哋講：「得喇得喇！我走先，你哋自己慢慢處理啦！」
最好笑係個經理同HR妹妹仔望一望我，然後個經理又繼續鬧。
我離開會議室，行到去佢公司門口嘅時候，嗰位由始至終都冇出過聲，唔知咩title嘅女人追咗出嚟同我講唔好意思，我照實答返佢：「你哋內部溝通都幾多問題，HR未搞清楚就約我上嚟，個經理都唔應該當住外人咁樣鬧，有咩in完先講啦，點搞呀你哋？」
個女人：「明白嘅！我會同佢哋反映，今次真係好對唔住，浪費咗你嘅寶貴時間。」都係啲官腔嘢啦，不過有追出嚟道歉總好過冇。
事後同身邊幾個friend分享呢件事，佢哋都問我點解就咁算，其實我唔係好脾氣，只係覺得時間已經嘥咗，咁可以點啫？繼續坐喺度睇佢哋內訌？而且擺到明唔會請我，早走早著費事糾纏啦！