早幾日in咗一位叫Gary嘅求職者，我做HR咁耐都係第一次遇到呢種情況，佢見見下工電話響，然後話唔好意思要出一出房講個電話，咁可能係急事呢，何況大家都傾到最後階段，連人工都agree埋，點知Gary返入嚟之後忽然話要再加$2,000先會take offer……
嚴禁轉載聲明：文章版權為《辦公室日報》所擁有，由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的內容放在其他網站圖利。
其實Gary呢次已經係second in，第一次淨係見我，second in我就叫埋line manager一齊見，Gary填嘅expected salary係$23,000，而公司畀呢個position嘅budget係$22,000至$25,000，由於in完兩round覺得唔錯，我同line manager都決定confirm offer，並且主動同Gary講，人工可以畀多$2,000，即係budget嘅maximum $25,000，應該皆大歡喜啦！
Gary：「好多謝你哋呀！我冇問題，可以隨時返工！」聽得出Gary當時都好開心，仲連續講咗好多次多謝。
口頭上同意晒人工細節之後，我、Gary，仲有line manager三個人仍然繼續傾咗一陣，大家言談甚歡，突然Gary手提電話響，佢話要出一出房講個電話，本身想直接完咗個interview，因為Gary走出去講係冇意思，行出會議室就係我哋office，佢講電話都未必方便，不過Gary一個箭步標走咗，咁咪等埋佢囉！
等咗唔係好耐啫，前後三至四分鐘，Gary入返嚟嘅態度就已經變晒。
Gary：「唔好意思，頭先headhunter打畀我，之前經佢哋介紹見咗另一份工，而家請咗。」
我：「咁即係……你決定揀另一份工，唔take我哋呢個offer？」
Gary：「其實我鍾意佢哋間公司多啲，嗰邊規模大啲，同埋個headhunter幫我爭取到 $26,000，多過呢度。」
我同line manager都呆一呆，唔係驚訝有人出 $26,000請佢，只係疑惑緊我哋係咪要講啲咩打圓場？
Gary見我哋冇反應，又補充多一句：「 $27,000吖！如果你哋可以畀到 $27,000，我就即刻推咗headhunter嗰邊，下星期一就返呢度。」
原來係討價還價……
Line manager：「如果 $27,000要再請示老細，而家應該畀唔到答覆你……」
Gary未等line manager講完就企起身：「咁冇辦法喇，嗰邊出 $26,000，公司又大啲，我冇理由 $25,000返呢度，唔好意思，走先！」
佢講完「走先」，真係拎起個背囊頭也不回咁離開會議室，講真都幾冇禮貌，同幾分鐘前猛咁多謝我哋出offer嘅態度形成強烈對比，變臉速度好快，我同line manager係呆咗咁坐喺房靜咗幾秒，大家嘅反應唔係嬲，反而係一齊笑咗出嚟。
HR：「其實$27,000應該都冇問題嘅，你使唔使我call佢（Gary）返嚟吖？」
Line manager：「加多$2,000我都話到事，不過無謂啦，我頭先本來想話祝佢新工順利，等個氣氛唔使咁奇怪，點知佢走得咁快。」
因為有個別同事見到呢位求職者interview途中走出嚟傾電話，仲聽到佢講電話嘅內容係有新offer，又大大聲講人工價錢，所以及後都有同事向我哋八卦下發生咩事。
其中一位同事話：「都幾現實喎，就算係turn down你哋，會唔會之後講返會好啲，見緊工聽電話已經好唔尊重個interview。」
我反而好欣賞個line manager咁樣回應個同事：「作為一個求職者，又唔係對我哋公司有咩特別偏好，咁一定揀最價錢高嗰個offer啦！佢係現實咗啲，不過都冇錯吖，即刻搞清楚仲好，總好過呢頭答應我哋返工，轉個頭又打嚟話都係唔返。」
我：「起身即走你都唔嬲咩？頭先仲識同我笑。」
Line manager：「尊唔尊重，禮唔禮貌，呢啲係好廉價嘅門面嘢啫！佢頭先起身即走，係因為覺得唔揀呢份工唔使再見到我哋，仲有咩好糾纏吖，咪阻人發達啦！」
咁又係嘅，調返轉嚟講，我相信好多求職者去見工時，都有受過唔禮貌或者唔尊重嘅對待，Gary現實啲都冇錯嘅，如果佢當下take咗我哋個offer，去到返工嗰日先至no show，咁我應該會仲嬲，而家清清楚楚幾好。
不過求職者見見下工走出去傾電話，返入房就態度大變然後講價，我自己都係第一次遇到，好啦！我又要重新in人喇，希望好快可以請到人啦！(完）
18歲即刻去紋身 不幸的人用一生治癒童年
https://youtu.be/rRqnA-OiwFA