做HR咁耐，遇到嘅求職者都係盡力爭取高啲人工，人之常情吖，待遇差過舊嗰份，咁轉工嚟做乜？真係貪見工好玩咩？但我之前竟然遇到一個主動減薪，仲自己提議可以拎少啲大假嘅candidate……甚至我已經confirm埋offer，佢都可以臨返工前一日打嚟同我講：「我真係唔使咁高人工喎！」
可能聽落會覺得好搞笑，但因為我知來龍去脈，明白佢點解會咁，所以反而覺得有啲可憐，首先呢位candidate填expected salary已經寫13,000，但呢個position公司offer嘅range係20,000至23,000，當日我睇完份resume再call佢嚟見工，就係覺得佢嘅background完全ok，然後last salary竟然得12,000……
Interview嘅過程我覺得完全合格，所以後段我未同佢傾人工，已經直接同呢位candidate詳細講公司有咩福利，當佢聽到我哋一年有12日大假之後，衝口而出就同我講：「12日Annual leave咁多？」
多？其實唔算多，我出面班friend啲公司仲多，我哋公司叫做普普通通，比上不足，比下有餘咋！
因為佢份resume唔會寫舊公司有咩福利同埋幾多日大假，咁我就好奇問佢：「你之前份工幾多日AL？」
「一開始7日咋！逐年加一日，我臨走都係10日，但冇一年係放足。」
我：「可以放唔足㗎咩？」
「可以，好多時入假紙都唔批，我記得自己第一年都係放咗4日，遞親都唔批，然後因為超過期限就全部取消，其實我可以拎少啲大假，唔使12日咁多㗎！」
我：「梗係唔得啦！呢個係合約，係公司規矩，唔會特登改一份少啲Annual leave嘅contract畀你，同埋呢度大假係可以累積，我哋有同事之前因為太忙放唔到，唔係我哋唔畀佢放呀！老細仲迫佢放添！然後佢積積埋埋有成20幾日，我哋都容許佢一次過放晒，即係成個月唔喺公司，所以呢方面你可以放心。」
「咁好㗎咩？」
我：「另外我哋有Birthday leave……」
「生日都可以放假？咁即係唔止12日？一定要生日正日放㗎？如果撞正紅日呢？」
我：「唔一定要正日放嘅，畀咗你就係畀咗你，不過Birthday leave盡量希望同事喺生日嗰個月份放埋。」
呢位candidate聽完好似打開咗新世界大門咁，我再接住講Medical Insurance 同埋13個月糧，另外再有bonus，佢又非常驚嘆。
「我之前份工冇雙糧㗎！真係第一次。」呢位candiate之前都係做過一份工啫，可能佢第一間公司係咁，又未有機會喺其他地方返工。
我：「不過花紅就講唔埋嘅，公司試過生意唔好都係得幾千蚊，所以你真係當bonus啦！呢個畀唔到實數你，但係13個月糧就肯定有，會寫喺合約裡面。」
當時唔係即刻請佢㗎！我係隔咗一日先打畀佢confirm offer，再嗌呢位求職者1號返工，我打畀佢講offer嘅時候仲經典……
我：「人工方面係23,000，OT要超過7點先開始計。」
「23,000？我真係唔使咁高人工喎！會唔會削弱咗我嘅機會㗎？其實我跟返expected salary 13,000真係ok㗎！」
我：「點樣削弱你嘅機會呀？我而家打嚟咪就係confirm offer囉，請咗你㗎喇！」
你問我一個candiate本身嗌13,000，其實我可唔可以壓價？實得㗎！我估開萬七萬八佢都好開心，但既然公司個range開得20,000至23,000，我壓嚟做乜呢？慳咗嘅錢又唔會加落我份糧度，何況老細唔係差呢幾千蚊開飯啦！
平心而論，我唔係要慷老細之慨，而係呢個candidate本身嘅能力絕對值23,000，佢之前拎唔到呢個水平嘅人工，唔係佢有問題，而係佢舊公司開嘅條件太差，完全唔貼市，其實咁樣對員工影響好大㗎！拎住12,000嘅last salary去見其他工，嗌返個正常價都會有人覺得你獅子開大口。
12日大假佢未曾有過，Birthday leave佢甚至未聽過，知道有13個月糧又好似中咗獎咁，一切都係舊公司賜予佢嘅自卑感，令佢認為自己唔值得咁好，其實呢個世界大把人呃飯食，行行企企又一日，然後人工同福利比我同你更好，而且打工係等價交換，唔應該咁自卑㗎！人要相信自己值得更好，你先至會有進步。
最激死係佢臨返工前一日主動打畀我：「Hello，你好呀，我想問下呢，如果我可以降低啲人工，試用期會唔會穩陣啲？因為我預咗13,000都得，我怕人工太高，老細會唔鍾意，又或者對我嘅期望會高好多呀！」
我冇心，但當時控制唔到自己同佢講：「得㗎喇，你唔使搞咁多嘢，開咗23,000就係23,000，唔好搞到我又要打過份合約。」
而家佢已經喺我公司做咗半年，日日都朝氣勃勃咁，完全理解，由地獄過嚟，呢度對佢嚟講簡直係天堂，人工又多咗一萬有多，換轉係我都搏盡啦！