係時候同大家宣布，我拍拖喇～
有次同朋友食飯，對方帶埋一個女仔出嚟，我見到嗰陣已經眼前一亮🙈全程冇乜聽個朋友講嘢，只係一直盤算點樣拎呢個女仔電話，下次又點樣再約佢出嚟，最後我講自己做speed dating，個女仔又表現得好奇，就順勢話得閒send啲information畀佢睇，最後成功交換contact✌🏻
不過正式一齊之後，我發覺呢個女仔唔會呷醋，有次同佢講：「識咗個女member好funny㗎！幾靚女又幾搞笑，唔知點解會冇男朋友，可能係工作同生活圈子太窄。」
我女友唔單止冇呷醋，仲話：「真係？下次約埋佢出嚟食飯吖。」
有時公司有突發嘢做，有同事即興約食飯，佢喺隔離聽到會叫我：「你去啦！唔緊要呀，我自己返屋企ok。」
食飯、行街、睇戲，佢都係同我講無所謂，食好西又得，食個15分鐘嘅茶記快餐又得。
易話為係好事，不過我慢慢覺得好似……差咁啲嘢，所以忍唔住問當日介紹我哋識嗰位朋友，先知佢以前對個EX都好痴身，會呷醋，會介意，會有要求，只係個EX一腳踏兩船，佢受到好大傷害，而家唔敢太投入，唔敢再倚賴。
我知道咗成件事，包括當中嘅細節，朋友叫我唔好擺喺心，可惜我做唔到，即晚就約咗佢出嚟，一見面連招呼都冇打就攬實佢，我話：「對唔住，我嚟遲咗！」
女朋友最初唔明，仲同我講：「你都冇遲到，做咩攬咁實呀？唞唔到氣喇。」
我堅持自己有遲到，唔知佢明唔明，但最後佢都同我講：「遲到好過冇到，等到你啦！」
而家佢會呷醋，會介意，會有要求，煩咗好多，不過我鍾意。
當一個人受過傷害，佢對下一段感情嘅投放就自然會減少，好簡單嘅一個道理就係見過鬼會怕黑，我哋每個人都有過去，如果你嘅另一半都係咁，希望你可以更加愛佢，保護佢，珍惜佢，令佢變返一個敢愛敢恨嘅人。
祝我自己幸福！同時都祝你哋每個人都幸福！