較早前老細請司機，嚟見工同試車嘅應徵者當中，有人手車好穩，有人好熟路，而最終由一位叔叔脫穎而出，佢係贏在一個舉動同埋一段經歷，好想喺度分享下，因為都改變咗公司裡面其他揸車嘅同事。
見工流程係應徵者上嚟office填form傾兩句，ok就落樓試揸，老細有時間會落嚟跟車，冇時間就由我坐，有一位叔叔落到停車場之後唔係即刻上車，而係圍繞架車行咗個圈，又細心檢查車底，我當時仲心諗會唔會over咗呀？
雖然好多揸車嘅人都會check下先開車，但我哋前後見咗十幾個應徵者，只有呢個叔叔檢查得咁細緻。
老細上車後問佢：「你平時都會咁check？有養貓？驚街貓走落車底？」
叔叔：「我本身有養貓，但咁樣check係因為遇過心術不正嘅人，好多年前自己揸車，其實都係循例睇一睇，點知畀我發現有隻貓喺車底，綁住條繩，似係有人特登咁做。」
我插嘴：「咁變態？」
老細：「如果你冇check就開車，隻貓就冇㗎喇喎！」
叔叔：「係呀，起初諗係咪隻貓纏咗繩，唔小心跑落車底套實，因為要特登綁隻貓喺車底都唔容易，條友要瞓落地捐入去先做到，不過條繩又打咗結，似特登，當時我住嗰區仲有人專登落毒搞流浪狗，擺啲有毒嘅食物喺草叢同路邊，有人放狗都中招，個世界真係有呢種變態嘅人，你諗下，專登綁隻貓喺車底，要幾變態先做得出，所以check下穩陣啲，唔係嘥好多時間啫！」
因為呢番說話，老細決定請呢位叔叔，更加將呢段經歷分享畀其他有揸車嘅同事聽，所以而家每日放工落停車場嘅時候，同事都會好一致咁check下架車先至開，唔會因為天氣熱或者泊室內就大安旨意，呢個新請返嚟嘅司機真係改變咗大家嘅習慣。
另外，如果有人將來去應徵司機工作，不妨參考下叔叔嘅做法，check下架車先至開，或者呢個加分位會幫你見成份工㗎！