話說我4月中嘅時候去見工，職位係Manager，對方負責interview嘅人除咗HR之外，仲有一位已經遞咗信嘅Manager，換言之我嚟緊就係直接做佢嘅replacement，其實成個interview過程好順利，佢兩個仲要同一時間見我，亦可以話係一Take過，當日我已經confirm埋offer，落實埋5月中就返工。
去到5月頭嘅時候，我收到嗰位Manager嘅電話，佢嗌我6月初先至返，理由係有啲程序未搞掂喎，咁都冇辦法啦，當時做緊嗰份工我又辭咗喇，費事同新公司嘈之餘，我亦當畀自己抖多半個月，仲順勢買埋機票同老婆去個旅行充電，等自己返新工之前輕鬆下囉！
點知喺我返新工嘅第一日，個HR無厘頭同我講咗句：「你做咩推遲半個月先返呀？Jeff（之前In我個Manager）都走埋喇，老細差啲想放棄，開到口叫我搵第二個。」
其實HR係笑笑口同我講，態度都好友善，問題係我冇推遲半個月先返喎！正確嚟講唔係我主動提出6月初先返㗎！
我：「咩呀？你哋打嚟叫我6月初先返工㗎喎，係咪有咩誤會？」
HR：「下！點會呀？我都冇打過畀你！」
我：「嗰位Jeff打畀我㗎！佢話有啲程序未搞掂，係佢叫我遲半個月先返工。」
HR：「Jeff同我哋講，你舊公司嗰邊辭職有阻滯，要跟埋啲手尾先可以過嚟返工，唔係咁咩？」
我：「當然唔係啦，嗰日嚟interview出埋offer，我第二日已經向舊公司辭職，因為你哋想我5月中返工吖嘛！點知Jeff喺5月頭打嚟，話想我遲啲先返，搞到我多咗兩個星期唔知做乜，所以特登買機票同屋企人去一轉旅行。」
講到呢度，我同個HR都充滿問號，不過HR好似feel到唔對路，即刻轉口風話唔知咁多，最緊要我已經嚟咗返工。
因為HR話呢度個老細差啲想放棄再換人，所以我聽完之後耿耿於懷，本來冇打算節外生枝，但偏偏又有人「主動」話畀我知。
由於我諗住新嚟新豬肉請自己部門同事食飯，第一日嘅lunch就同大家去咗酒樓飲茶，期間佢哋講起本來可以早啲見到我，不過上手Manager話唔想同我交接工作，所以特登叫我遲啲先至返，而且係計好晒數……
我：「佢親口同你哋講？我都覺得奇怪㗎喇，今朝人事部話係我主動要求遲半個月返，根本冇件咁嘅事。」
其中一個同事回答：「係呀！佢笑住同我哋講㗎！話最憎教人做嘢，呢條友平時已經好卸膊，慣咗㗎喇，唔意外。」
班同事仲話畀我知，呢個阿Jeff噚日last day，而我就係今日返工，時間計到啱啱好，不過佢哋淨係知阿Jeff叫我唔好咁快返，至於Jeff喺電話裡面點樣同我講，同埋點樣同人事部講，呢啲佢哋就冇知得咁詳細，呢餐茶聽晒成個故事都覺得好驚訝。
另一位同事見我有啲唔高興，隨口補充返一句：「其實都唔緊要嘅，冇咩特別嘢要教，公司啲嘢我哋仲熟過Jeff，你唔使見到佢仲好啦！」
好多謝呢班新同事講出實情，但我唔係擔心自己做唔嚟，我係嬲緊點解呢個阿Jeff要咁樣害我！你唔想教啫，點解要搞到新老細對我留低壞印象呀？公司仲差啲放棄我唔想等……我係辭職跳過嚟㗎！屋企有大有細，如果過程中真係cancel咗個offer，你好唔好意思呀？
呢餐茶仲聽到班同事講阿Jeff好多壞話，好明顯呢位前任Manager係犯眾憎，原來佢都係做咗一年㗎咋！
唔怕同你講，我嬲到想打電話去質問呢位阿Jeff，但無論我用乜嘢電話打畀阿Jeff都冇人聽。
我又試過搵HR重申推遲半個月返工係阿Jeff搞出嚟，不過唔肯定HR會唔會幫我向老細解釋。
投稿係想問下咁多位意見，我應唔應該自己搵老細講多一次件事呢？真係好唔想一入嚟就畀老細誤解，但係連張凳都未坐暖又走去講上一手壞話，我又怕自己建立咗一個多是非嘅麻煩友形象。