我係HR，公司某部門請人，Line Manager要同我一齊見求職者，過程唔詳述喇，淨係想講有個女仔in到尾聲嘅時候，好正路咁問返我哋問題。
求職者：「想問呢個position係replacement定係新㗎？如果係replacement，可唔可以問上一手離職嘅原因？」
我作為HR就幫手答：「呢個position係新嘅。」
Line Manager插嘴：「其實你唔使知咁多，我哋唔會請你。」
頂！唔使咁直呀？個女仔面色都變埋。
氣氛尷尬，我打個圓場：「或者今日見到呢度先吖！」
求職者：「即係我唔使等消息？」
Line Manager：「係，我哋仲有其他人會見，但就算見唔啱，都會再出廣告請人，所以你唔使等消息。」
女仔對眼紅晒，不過佢好識做，答咗句「好」就起身走。
後來我同個Line Manager講：「你會唔會直得滯呀？ 」佢又答返我，如果唔請，不如唔好畀假希望人。
我明，咁你想對方知道冇機會，都可以有技巧少少吖，舉個例，我如果好想請對方，但當下未可以做決定，我會同個求職者講多啲公司嘅嘢，等佢picture到之後入嚟做嘅情況，再將等消息嘅時間講得實在啲，就算最後唔請都會通知佢。
假設好似呢個女仔咁完全冇機會，我會將等消息嘅時間set短啲，例如兩三日內，盡量唔過一星期，咁對方就唔使無止境等待，另外，我一樣會回答佢所有問題，人哋嚟見工嘅experience好啲，對公司形象亦有幫助，佢將來唔係員工啫，都可以係客㗎！
想問大家見工會唔會想遇到Line Manager呢種人？唔怕難聽最緊要直接，定係多少都留一線，起碼唔會打擊搵工嘅自信心？