上星期去見咗份工，個經理一路睇住我份CV一路問我：「你last salary $31,500呀？你覺得高唔高吖？」未試過interview畀人咁問，唔知佢咩葫蘆賣咩藥，難道我會答：「$31,500好高呀，不過無聊屎忽痕所以都係想轉工。」而家啲interview question水準咁低㗎咩？
嚴禁轉載聲明：文章版權為《辦公室日報》所擁有，由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的內容放在其他網站圖利。
我唯有照直作答：「唔高，所以我先會選擇搵份更好嘅工作。」
其實我仲想補充多幾句，因為轉工除咗想有更好待遇之外，亦有考慮埋行業前景，絕對唔係三言兩語就講得晒，點知個經理忽然好激動：「我喺你呢個年齡嘅時候，已經唔止搵呢個數，所以$31,500唔係唔高！係好fucking低呀！」
咩事啫你？搵$31,500嗰個係我，又唔係你，使唔使跳晒掣講英文粗口呀？
佢嚇到我唔識得畀反應，然後個經理繼續問：「你估我幾錢年薪？」
鳩知咩！就算你而家公司啲同事都未必知你搵幾多啦！到時估得低又話睇你唔起。
我求其答：「你年薪？應該過百萬啦！」呢個答案啱唔啱聽呀？
經理：「過百萬？梗係唔止啦，我半年已經過百萬，你要相信自己嘅價值，你要揀啱公司！揀啱平台！」
我：「明白！」
嘩，冇死啦呢次！睇嚟間公司出手好闊綽喎！
經理：「你下個禮拜二，即係國慶假期完咗之後返工有冇問題？我哋有位同事4號last day，想你同佢交接下，但因為公司冇吉位畀你坐呀，如果唔係我直頭想你聽日返，下個禮拜二你跟個同事follow up下先，4號開始你就坐佢個位啦！」
我：「冇問題，咁我下個禮拜二返工吖！」
經理：「Good！人工方面暫時$30,000，過咗試用期會加返……」
等等先，人工$30,000？
我知佢未講完，不過我已經忍唔住插嘴：「$30,000？我last salary $31,500，expected salary填$33,000至$35,000，你個offer係$30,000？」
再重複佢開$30,000，係想make sure自己冇聽錯，同時make sure佢冇講錯，頭先你唔係龍咁威，勁過雙刀火雞㗎咩？又話我$31,500好低，又話喺我呢個年齡唔止搵呢個數，仲爆晒英文粗口，係咪一時口快快講錯咋？
估唔到個經理仲躁過我：「我咪同你講咗囉！你要揀啱公司，揀啱平台！」
我冇再即時反駁，因為個腦仲思考緊，究竟in我呢條友係咪患咗無定向喪心病狂症。
經理又再用激動腔同我講嘢：「畀啲時間去浸淫，夾埋天時地利人和，假以時日你都可以好似我咁，出嚟做嘢唔好淨係睇銀行戶口呢一刻出幾錢糧（佢講『呢一刻』3隻字嘅時候好用力），你要睇埋人脈，仲有潛在嘅opportunity……（下刪幾百字）」
我：「Ok，咁我下個禮拜二返工吖！」
經理：「Good！下星期見！到時人事部會幫你搞咗入職手續先，記住帶證件相，因為要做職員證。」
嚟到今個禮拜二，即係3號，我冇去返工，直接no show，鬧我啦鬧我啦，冇問題㗎！我淨係希望佢個同事真係4號last day，搵唔切人返嚟交接咋！
然後3號同4號連續兩日，我個電話都畀呢間公司打爆，3號勁啲，淨係10am至11am期間都打咗十幾次，4號少咗，不過都keep住每個鐘打一次，經理一定好嬲喇，但與其花時間call我，不如快啲請返個人仲實際啦！(完）
18歲即刻去紋身 不幸的人用一生治癒童年
https://youtu.be/rRqnA-OiwFA