想要女朋友卻單身人士
與及
想要男朋友卻單身人士
見到一篇標題「想要女朋友卻單身人士」嘅文章，心諗：「喂，你唔好寫咁中呀，我嬲㗎！」😂然後好認真睇晒列舉嘅幾點，想知我仲有冇得救？
1）經常讚好、分享學生妹、AV女優、性感女星、台妹櫻花妹韓女團的好J圖
問心嗰句：真心冇，有個page更加要小心，我隻手指肯肯定肥過姜B，正苦練「左Yau」做重心hold住部電話，用右手食指loop content。
2）錢財方面感受到小家
問心嗰句：近3年我應該未試過比人搶到張單，得一個人例外～～～蕭叔叔，有次去陸羽，佢主場。
3）對於某些社會議題過度偏激
問心嗰句：無意向女警施暴，見到都冇胃口，但係經常將3萬thx同埋黑警死全家掛在嘴邊，唔知算唔算。
4）口口聲聲說沒有要求其實有要求
問心嗰句：頂你咩作者，中到啪啪聲呀！你做咩要hurt我呀？😂😂😂下面解釋。
5）連自己都不知道自己想怎樣
問心嗰句：屋企有一塊黑板同兩塊白板，詳列未來一個月要做咩，做完一樣刪走一樣，以前做headhunt學返嚟。其實我好清楚自己想要咩，無論感情、工作，同埋人生。
文章中所講到嘅港男，的確係有存在，我都見唔少，好理解筆者寫出嚟嗰陣懷住咩感受，以前做報館，有個男同事肥到咩咁，當時佢未拍過拖，然後佢日日批評呢條女嗰條女，你唔知以為佢咩紳士蘿蔔皮咁高要求，若干年後喺街撞見佢拍拖，佢女友…….
公平啲，我亦聽過女仔講，想要個六呎高肌肉型男友，重點係佢自己得4呎幾，後來知佢同一位男同事拍拖，佢男友……
所以我將話題延伸去「想要女朋友卻單身人士」與及「想要男朋友卻單身人士」，因為我諗唔少男女都會遇到相同問題，或者會中晒上述5點🙈。
只係單身人士有好多比較深層嘅嘢未必係外人肉眼見到，想要另一半卻單身，可能同經歷有關，我就係影埋婚紗相都結唔成婚嘅人，你問我想唔想結婚生仔，我好想，但我驚，所以我謹慎。
自我懂性以來，日日見住父母嘈交，打交，喺我面前爭住爬出窗跳樓都見過，所以我幼稚園都換咗三間，因為試過跟阿媽返娘家，又試過跟阿爸返阿爺屋企，住嘅地點不斷轉換，後來我讀小學已經見證父母離婚，而我大個少少之後，經常都比屋企人摷櫃桶，摷書包，拆晒所有信，毫無私隱可言。你問我想唔想結婚生仔？我好想，但我驚，同時想自己有經濟能力獨立之後，搵返以前細個冇既空間同埋私隱，其實一個人點樣成長，條路點行，好多時係受到細個經歷影響。
所以身邊有「想要女朋友卻單身人士」與及「想要男朋友卻單身人士」，其實佢哋未必想咁㗎，有問題嘅未必係佢哋，而係令佢哋變成咁嘅人，有種人成日笑臉迎人，但內心已經遍體鱗傷。
至於「口口聲聲說沒有要求其實有要求」，畀我三分鐘時間抗辯。唔係畀得200蚊又要李嘉欣，反而係我太了解自己喇。
試過遇到一個女仔幾好，當大家「戀人未滿ing」，我發現佢好鍾意講電話，而我係唔鍾意煲電話粥嘅人，所以最後打退堂鼓，咁我算唔算「口口聲聲說沒有要求其實有要求」？
年紀唔細喇，以前細個係：「喂，受唔受溝呀，一齊啦！」大個咗時間愈嚟愈少，需要慢慢觀察呢個人係咪可以一直走落去，會好著重細節。「想要另一半卻單身人士」，可能係太了解自己想要咩。
最後強調，中晒5樣唔知自己想點嘅男女其實都唔少，筆者寫文時相信係見到一個類似我舊報館男同事，肥到隻野又成面油，冇拍過拖，日日著拖鞋返工，唔知做緊咩又日日同人討論國家大事，仲要彈晒四周圍啲女嘅港男，我想講筆者將感覺化成文字已經好斯文，當年我直情想打柒嗰條肥仔。
（PS：經驗之談，有啲男人斯斯文文唔講咸嘢，未必唔咸濕，可能仲變態，隨時返屋企自己著絲襪玩青瓜，所以結論係作為女仔，佢有冇like J圖都要小心呀，世界上冇一個衰佬係磨菇㗎！😂😂😂）