想知自己係咪問錯嘢。
Send咗CV搵工，其中一間公司同我Zoom Interview，正頭正路咁樣in啦，去到最後個HR講：「如果ok，過兩日叫你直接上嚟，到時唔係見我，係見個Manager，記得帶齊reference letter畀佢睇，你有冇咩想問返我？」
我：「好呀，想問下呢個position有幾多日大假？同埋有冇雙糧bonus？因為個job ad冇提到。」
HR：「嘩！你全部都係講錢嘅！我哋唔好講呢啲先啦好嘛，你應該問返啲同工作有關嘅嘢。」
佢當時語氣都幾差，不過我想解釋下，因為我本身有份工未辭職，如果第二次要親身去interview，即係最少請半日假，人工已經冇即時問㗎喇，預咗要見埋個Manager先，始終唔同人可能有唔同offer，不過幾多日大假？有冇雙糧？bonus係咪形式？照道理有晒準則同定案，你揀我時我揀你，都要聽下係咪值得繼續見落去，何況你嗌我問返同工作有關嘅嘢，乜福利係無關㗎咩？
我：「咁我而家唔問，下次都會問㗎啦，你話下次直接見Manager，benefit呢啲嘢唔係問你合適啲咩？」
HR：「你仲係講錢呀？咁我諗唔啱喇，唔好意思，今日到此為止。」
然後佢直接disconnect咗個Zoom Interview，我想問下自己係咪問錯嘢？第一次in真係唔可以問？強調多次，已經唔係問人工，我問福利咋喎，咁我都要衡量下值唔值得move on啩？有錯麻煩大家指正。