年三十晚因為返屋企食飯，特登去撳多啲家用畀阿媽，跟手發現銀行戶口多咗錢，而且數目唔細，有成$18,750左右，因為個account有幾多錢我好清楚，即刻online banking睇下咩事，原來係舊公司過數落嚟。
我係2023年6月中resign，7月中轉工，換言之都走咗半年有多，照計唔會出錯糧吖，點會半年後先走嚟錯呢？更何況我之前份糧有成$30,000，即使係錯都唔啱數啦！
由於發現時已經係年三十晚，之後連續幾日新年假，想打去舊公司同會計講都冇人聽，一直忍到上星期尾再打去，終於搵到個會計喇！
「冇錯呀！老細話按比例出返bonus，你7月中走係呢個數，Send咗email通知㗎，係咪落咗垃圾郵件？你check下啦！」
既驚，且喜。原來舊公司真係有send email畀我，只係我好耐冇check私人電郵，最意想不到當然係舊老細竟然向已離職同事發放bonus
呢位會計仲話，其實歷年都會「追出」bonus畀走咗嘅同事，唔係特別對我好
除非嗰個人做嘅時間太短，又或者係工作表現好差好差，否則一律會咁做，但亦因為有以上因素，所以入嚟做嘅時候唔會寫落合約，唔會百份百保證resign後有得出。
真心，嗰下係好感動，邊度仲有呢啲咁好嘅老細同公司㗎？其實以前都做得開心，無奈為咗有更好嘅發展，最終我選擇轉另一份工，只可以講句，我冇後悔轉工，但更加慶幸做過呢間舊公司，唔係多咗筆新年財嘅問題，而係佢哋嘅舉動令我心頭一暖。
本身諗住叫會計駁內線畀舊老細，想親口講聲多謝同埋新年快樂，不過離職後又冇特別聯絡，收到bonus先講埋啲賀年說話感覺更加市儈，所以我決定迂迴啲同低調啲，請呢位會計轉達我嘅謝意畀舊老細知就算，誠心誠意祝舊公司長做長有。