我係temp，即係臨時工，因為headhunt介紹而入咗一間公司做，就連出糧都係由headhunt嗰邊入數畀我，唔係由呢間公司直接出。一開始已經講到明呢個position只係做5個月，本來覺得easy come easy go冇乜特別，冇諗過自己做做下會有啲hard feeling……
呢間公司有個類似「每月壽星」嘅活動，嗰個月生日嘅同事會出晒嚟切蛋糕，其他人就會圍埋一齊食，不過Admin當時就同我講：「Temp唔使，淨係長工同事。」由於我已經係第3個月喺度返工，所以呢句說話亦都聽咗第3次，只係呢次特別難受。
係咪咁想同大家慶祝？係咪咁想食人哋個生日蛋糕？唔係食嘅問題，係感受嘅問題，因為我都係7月生日，而且佢哋切蛋糕呢一日，亦咁啱係我生日正日，所以5月同6月我係冇乜感覺，今次被排除在外，全公司其實又得我一個temp，有種莫名其妙嘅心酸。
我知道自己如果介意咁多嘢，日子會好難捱，而且有時同人講，仲可能被誤會好貪心，例如佢哋pantry同其他公司一樣，都有啲茶包咖啡畀員工享用，由day one開始已經有人同我講：「呢啲係畀full time同事，你要自己買，不過水機你係用得嘅，杯你都可以用。」
我又唔係被孤立嘅，因為同事對我冇嘢，當然都有一齊食晏，不過一涉及員工福利嘅部分就全部冇我份，之前咪端午節嘅，公司有派換糭劵畀同事，一派到我嘅時候，個HR就講：「Temp冇。」
冇唔緊要，你咪skip咗我繼續派囉，唔需要特登走埋嚟我度咁樣講一句啫！
都係嗰句，唔係貪你一張換糭劵，而係當每位同事收到再一齊討論嘅時候，我係戇居居一個好似被冷落同埋被遺忘，感受真係好差。
其實我係連影印嘅資格都冇㗎！呢度部影印機設定咗要輸入員工嘅code先可以print嘢，temp嘅同事係冇呢個員工code，我每次print嘢都要同上司講，再由上司叫一個同事幫我，成件事好迂迴。
入職第一日上司甚至同我講過，pantry個微波爐我係用得，但如果要叮飯盡量讓畀其他同事先，我最好最後先叮，因為full time同事可能做嘢比較趕。
雖然我唔帶飯所以冇呢個煩惱，不過試諗下，假設我去叮飯，點知自己係唔係最後？幾時係最後？唔通開雪櫃睇下仲有冇人個飯盒未拎出嚟叮？
原先我以為自己唔介意，都係5個月啫，點知有啲細微細眼位都係會覺得難受，因為有好強烈嘅差別待遇，冇福利我明呀，pantry啲茶包唔用得、print嘢要問準上司、叮飯要讓人哋先，需唔需要咁小家呀？
或者企返喺full time員工角度睇都係好事，唔使畀temp嘅同事搶晒資源，要怪就怪自己只係temp啦！
最新嘅發展係，今個月中開始我要坐pantry，佢哋話要騰個位出嚟畀一個外判嘅IT，唔知點樣嗰位外判工要坐埋一齊方便做嘢，是但啦！又唔係坐廁所，純粹多人出出入入啫，而且我打算做埋呢個月唔做喇。
其實上個月已經同headhunt講咗次，因為由headhunt介紹，resign應該係同佢哋講，個headhunt話我仲有兩個月，不如做埋佢，結果我心軟，無奈一路做一路覺得好卑微，感覺唔好，想問下係咪我自己唔識諗，太介意呢啲細節呢？
呢次我會同headhunt講已經搵到長工，所以就算佢再叫我留低都會拒絕，而現實中我係未搵到新工，我都有啲擔心自己呢個決定係太魯莽。