我個friend，嚟緊12月就39歲，你當我愛之深恨之切，但實在唔明白佢咩心態？大家一齊畢業之後，同學都分別踏入職場，佢就話要繼續進修，當年就梗係冇問題啦！見佢讀完一個學位又一個學位，一時又讀商業，一時又讀心理學，一時又讀神學，總之30歲都未開始搵工。
大佬呀！讀書冇問題呀，不過要錢㗎嘛！啲乜鬼嘢政府資助一早用晒啦！因為大學時已經認識，時間太長喇，所以我都識得呢個朋友嘅屋企人，佢阿媽直頭打過幾次畀我：「你幫我勸下阿健啦！我同世伯年紀大喇，真係冇咁多錢幫佢交學費，你可唔可以再幫阿健搵份工呀？一直讀書都唔係辦法。」
伯友話幫阿健「再」搵過份工，係因為我曾經介紹過工作畀阿健，條友做咗唔夠一個月就走，仲要係不辭而別嗰隻，搞到我要打去同嗰間公司say sorry（因為係搭上搭介紹佢去我朋友個朋友間公司），自此之後我就怕怕喇，人情債真係好難還，唔做唔緊要呀，你正式同人講辭職吖嘛！讀咁多書連呢啲基本嘢都唔識？
成班大學同學唔止我一個介紹過工作畀阿健，有人直頭引薦阿健去佢公司返工，可能有熟人喺度好少少，不過都係做得兩個月咁大把，仲有同學慘過我，彈咗阿健去一間公司之後，佢做咗兩日就走人，又係粒聲唔出冇正式resign，我哋呢班friend都算仁至義盡啦！仲點敢介紹呀？
我知道有句說話叫學海無涯，活到老學到老吖嘛！聽過啦！不過阿健嘅情況唔係呢種，佢所讀嘅嘢除咗樣樣都九唔搭八之餘，仲要係冇目標亂柒咁嚟，頭先都講過佢一時讀心理學，一時又讀神學，最新好似走去報讀中醫，唔知大家有冇少少了解，正式中醫課程其實唔平㗎，而且年期亦唔短，仲要實習呢樣嗰樣，但你讀嚟做咩先？掛牌診症咩？
「讀咗先算囉！咁中醫呢啲嘢始終都有用，我阿爸成日睇中醫，到時我可以幫佢睇。」呢句唔係幻想出嚟，阿健真係咁樣答我。
問題係你幫你阿爸睇症做乜鳩啫？當你出去睇一次嘅診金1000蚊好未？日日睇中醫咩？你讀呢個course都幾皮嘢啦！我諗你老豆寧願個仔正正經經出去搵工，幫輕下屋企，好過你一年幫佢把幾次脈啦！咁把完脈又點？咪又係要出去執藥！唔通喺屋企整個百子櫃呀？
阿健連法律同運動營養學都讀過，佢啲cert同埋各式各樣嘅學位我都聽到好亂，但你讀完又唔係學以致用，純粹一個course接一個course，學費又問屋企攞，讀呢啲唔係幾千蚊㗎，次次都萬萬聲，你阿爸阿媽識印銀紙咩！大學畢業之後又再讀十幾年，父母都老啦，先後退埋休喇，你仲想讀幾耐呀？
讀中醫之前阿健先唔知讀咗咩副學士（我真係聽到麻木，記唔返），當時佢仲搵我呻：「上堂全部都係啲廿零歲，我係全班最老，啲人好似唔想同我玩咁。」
咁我咪乘機同佢講囉：「好合理㗎喎！其實唔係反對你讀書進修，但你都冇方向，讀完又唔係做返相關嘅工作，你想點啫？啲cert仲厚過黃頁，究竟你讀咁多想應徵咩工呀？NASA太空總署呀？署長啲學位都唔夠你多喎！」
阿健聽完冇反應，有時我都諗自己係咪好衰？你唔做嘢喺屋企hea十幾年，我話你就正常吖，不過阿健又唔係喎，佢十幾年唔做嘢但同時讀緊書，我都唔識點講。
人愈大，公司愈難請你，呢個係現實，唔計出世頭嗰幾年，阿健都讀咗三十幾年書，講真而家先出嚟做嘢搵錢，去到退休都未必同之前交嘅學費打成平手，蝕㗎喎呢單嘢！
阿健成世人真正打工嘅period加加埋埋都冇一年（其實半年都唔知有冇），佢根本係逃避正式進入職場，我仲可以點勸佢呢？同時想問下，大家身邊有冇類似嘅case或者朋友？
