雖然香港去日本唔算長途機，但如果成程都有個小朋友狂喊，其實幾痛苦㗎！
一年一度公司旅行，今次去東京，同機有個大約3至4歲嘅小朋友一直高分貝咁喊，時而尖叫，未起飛已經嚟料，最黑仔係我同另外兩位同事坐正呢家人後面，個小朋友話細唔細，並唔係手抱嘅BB，點解同行嘅父母完全唔理呢？
個老豆老母坐低之後就掛住玩電話，兩個人冇勸個仔，更加冇氹，由得佢喊由得佢叫，起飛就掛住撳飛機嘅電影睇，我坐後面望得好清楚，老豆睇九龍城寨，老母睇破地獄（話時話CX啲戲都幾新），而佢哋個仔同場都破緊地獄，成班乘客亦仿如置身地獄，因為啲喊聲真係好擾民。
期間有空姐行埋去唔知同個老母講乜，因為太細聲我聽唔到。無論如何，個小朋友依然好似自生自滅咁尖叫同喊，我甚至發現佢嘅父母係眼尾都唔望下，真係親生？會唔會小朋友唔舒服呀？為人父母點解不聞不問呢？
情況維持咗40分鐘左右，坐隔籬個同事對住我講：「你數123吖！」
我：「咩123？」
「你數咗先啦！」
我：「1、2、3。」
一數完，我同事就以一個更大嘅聲浪「扮喊」，係咁「嗚嗚嗚」，怒吼咁嗌出嚟，結果前面嗰位小朋友嚇到即時收聲，佢父母都嚇親，仲好不滿咁擰轉頭睥住，我同事對住佢哋講：「哦！你個仔喊得，我唔喊得呀？」
同事以牙還牙之後，個老豆老母終於同小朋友講嘢喇，叫佢唔好再喊，原來真係佢哋個仔嚟㗎！差啲以為個小朋友自己搭飛機！
後段個小朋友冇再尖叫喇，但仲有兩三次試圖開聲喊，我同事好快就跟住扮喊，獅吼咁嗚嗚嗚，小朋友聽到又嚇到收聲，掂呀呢招！
個老豆老母應該好嬲，因為落機嘅時候仲睥實我同事，咁又點吖，個老豆矮過我同事成個頭，開拖都唔夠打。
最估唔到嘅事喺落機之後發生，公司個Old Seafood走嚟話個同事，原因係今次屬於公司旅行性質，呢啲行為代表緊公司，會影響聲譽喎……妖！我哋係微軟、蘋果、Amazon定新鴻基？邊個識我哋呀？多餘！呢位同事喺我眼中簡直係英雄，相信飛機上面9成嘅人都係咁諗。