一對一嘅matching收得貴，啲客又係咪會高質啲？
世事真係冇絕對。
呢類一對一，我哋事先會同會員見面，了解佢哋鍾意咩類型嘅異性？點睇愛情？之前嘅戀愛經驗係點？甚至會教佢著衫，教佢約會時點講嘢，一句到尾，唔deep啲，點敢收你咁貴呀？
有個男會員之前嚟到已經好多要求，佢希望我哋幫佢相約見面嘅女仔要大學畢業，仲要係名牌大學畢業，另外希望個女仔份工唔使拋頭露面？？？拋頭露面？？？咩年代呀？你驚我介紹怡紅院姑娘畀你呀？原來佢係想識個女朋友份工唔係sales或者receptionist嗰種，典型白領匿喺office做嘢唔會識到太多人嗰啲。
我覺得有啲人連伴侶識朋友都要管同埋禁制，其實唔係對伴侶冇信心，而係對自己冇信心，如果你怕另一半識到更正嘅人而走咗去，做法應該係upgrade自己，而唔係禁制另一半活動範圍，你limit佢搵工同埋朋友圈子係本末倒置。
點都好，解釋完畀佢聽，佢仲有其他要求，其中一個係女方人工要有30000以上，我問點解？佢話希望財政獨立，唔使結婚後要喺金錢上照顧對方。
本身都想唔理佢，偏偏阿姐彈個match到嘅女會員過嚟，我同女方講過上述嘅嘢，呢位女士又覺得見下無妨，反正個男人唔係禿頭同埋大肚腩，當見下囉！（註：一對一matching通常係一個價錢包兩至三次同異性會員單獨食飯，所以女方覺得只係用咗其中一次quota，唔介意見下）
以下我就開始要講粗口喇，DKLM個男會員出嚟之前問咗我好撚多次：「呢餐飯係咪可以AA？」我同佢再三強調其實冇規定要男仔請，你覺得係可以展示風度就請，亦都有大把女會員係初次見面唔畀男會員請，主動要求一定要AA，而女會員請返個男會員轉頭我都聽過。喂你比得咁多錢join個一對一plan，唔好煩埋啲食飯邊個埋單嘅濕碎嘢啦！又冇強制性要你比，約會嘅嘢自己執生啦，第日我幫你洞埋房戴埋套好唔好？
然後呢位男會員又反覆問我間餐廳貴唔貴？成條openrice嘅link send埋畀你，自己睇啦，至於你到時食咩就自己控制啦好唔好？點知你到時食沙律定係叫高級和牛啫！
一對一嘅matching，我係唔需要睇住佢哋食飯，只係到時上去餐廳同男女雙方打個招呼就夠，之後佢哋食乜傾乜點發展我係唔會理，當然再夜少少都會打個電話畀佢哋follow up下雙方感受。嗰次我去到餐廳想打個招呼就轉身走，DKLM個極品男客拎住menu捉L住我講：「點解晚餐貴咁多既？」
「畀咗openrice條link你睇㗎喎！」
男會員：「我睇佢平時lunch set 100蚊鬆啲咋喎，最貴都係百幾，冇諗過dinner要double咁滯。」
「呢度中環喎，再者dinner set 200幾，呢度裝潢唔算貴。」我心諗唔係要我幫你約去「大家食」相睇呀？
個男會員發返我脾氣轉頭：「你哋公司係咪同個女會員做媒，同間餐廳有合作，呃我嚟消費㗎？」
係咪CLS㗎！乜嘢陰謀論呀？做媒就再去貴啲啦，我問餐廳拎幾十蚊佣呀？
「我哋冇同餐廳合作，亦冇做媒。」
男會員：「咁食餐飯兩個加埋一，要成五嚿幾水落樓喎。」
講咗咁耐，我想話比你哋知，個女會員係一直坐喺度聽住，好L失禮呀！
然後女會員忍唔住出聲，但依然好有修養：「我出返自己嗰份啦。」
男會員：「係啫，不過一個人食個dinner set都二百幾，太貴，可唔可以轉場。」
我DLLM啦！
嘈咗一輪連侍應都行埋嚟睇熱鬧，男會員又講：「呢度坐低飲杯水仲有最低消費，喂你哋係咪真係做媒㗎！」
我真係要爆喇，但嗰位女會員比我爆得更快，佢喺銀包拎咗200蚊出嚟放喺枱面：「我幫你畀最低消費，我走先喇。」
不歡而散嘅一幕，第二日我同老細講，老細嬲到發癲，直接退返錢比條終極男會員，從此blacklist，個男會員竟然求我老細唔好，又打畀我呻：「你哋幫我再約啦，最多我再入返錢比你公司，我試過喺交友app識女仔，出到嚟佢sell買保險，嗰餐飯仲要我請，我驚你哋又係夾埋餐廳同個女仔做媒。」
對你交友app嘅遭遇深表同情，但我唔認同你當日咁冇禮貌，係咪我今日遇到你一個西客，以後就要對個個客都態度差？拍一次拖被飛，就要憎晒全部女人？有戒心唔係錯，但都要尊重自己，尊重別人，呢樣嘢唔止係結識異性嘅基本，仲係待人接物嘅基本。