「唔好意思，我resign，因為唔想就咁send email畀你，所以另外print咗出嚟，人事部嗰邊應該等你pass過去？定係我另外send封email畀HR？」向我resign嘅下屬叫阿君，佢不嬲都好做得嘢，但因為之前發生咗一件事，令到成個部門嘅氣氛，以致公司某部分嘅運作都徹底改變。
唔知大家有冇印象，之前有單新聞係講A1麵包店員自編自導現金付款優惠，呃客人畀cash買麵包有discount，結果穿櫃桶底呃咗公司11萬現金，我自己公司嘅情況都差唔多，唯一分別只係我哋老細冇選擇報警，否則計返個時序，應該係我公司呢單上新聞先。
我哋係做電子產品，順理成章有個維修部，一般而言，客人購買產品之後有一年免費保養，第二年有嘢壞就會視乎情況收費，零件損毀嗰啲肯定要收錢㗎喇，不過其他小問題呢，維修部職員係有權waive咗佢，即係豁免唔收，偏偏我哋有個職員叫Ling，只要件產品過咗一年保養期，佢就係唔係都照收錢。
OK，你照收冇問題，某程度上都係幫緊公司賺錢啫！不過阿Ling出完張單收客人錢，轉個頭就會cancel張單，改為waive單輸入公司系統，而我哋維修部之前係只收現金，講到呢度你應該明白咩事啦，即係阿Ling收完維修費然後自己袋，公司系統見到waive咗就唔會有數入。
正所謂上得山多終遇虎，因為維修部嘅師傅「唔爭氣」，有個客整完部機冇耐又壞，結果打去我哋head office大吵大鬧，強調一定要退返$350維修費，否則就去消委會投訴。
負責跟進嘅顧客服務部同事覺得好奇怪，因為睇返公司system，明明係waive咗冇收錢吖，所以最初以為個客心懷不軌想屈水。
後來對返張單，客嗰張係標明收咗$350，我哋system就顯示「豁免」，兩張單雖然係相同number，但銀碼有出入，一check就知道經手人係阿Ling。
因為怕怪錯好人，唔知中間係咪有咩誤會，所以我抽樣搵幾張由阿Ling負責嘅維修單出嚟，再逐個客打去問，咁當然啦，我係兜個圈問客人維修完有冇再壞，然後再試探性講下維修費嘅嘢。
唔check猶自可，一check之下發現，原來好多waive單都有收啲客維修費，阿Ling只係改一改再啪個掣更新system嘅record，一單半單當你手殘，一個月幾單，個個月都有喎，冇冤枉你喇啩！
阿Ling都好精，換零件嗰啲無可避免要收錢，呢啲單佢唔會打主意，阿Ling係「主攻」嗰啲過咗保養期，可收可不收嘅維修單，只要有客符合呢個條件，拎部機上嚟嗰陣又撞正係佢接，阿Ling就會用呢一招中飽私囊，將客人嘅維修費袋袋平安。
跟住就大工程喇，除咗要即時終止阿Ling嘅職務，成班同事仲要逐張阿Ling經手嘅單抽出嚟核對，好在佢嚟咗呢間公司只係一年唔夠，再多啲真係十日十夜通宵都check唔晒。
一開始咪話有個下屬阿君向我辭職嘅，咁又關咩事呢？其實阿君就係阿Ling嘅細妹。
阿君喺度做咗3年㗎喇，我哋公司不嬲有「Referral獎勵制度」，鼓勵員工介紹親戚朋友入嚟做，成功受聘係有獎金㗎！阿君當時就係介紹咗家姐阿Ling入公司。
老細最終決定放阿Ling一馬，淨係要佢嘔返晒啲錢出嚟，另外當然係解僱啦！咁點解唔報警呢，高層方面開過會，立場係「家醜不出外傳」，唔希望事件令到街外客覺得我哋唔專業喎，隨時仲會畀人當笑話講好多年，總之就奉行呢四個字－－－低調處理。
家姐阿Ling嘅事，阿君係冇份參與，不過介紹入嚟嘅親人穿櫃桶底，換轉你係阿君都會好難受，亦要承受一定程度嘅心理壓力，何況我哋公司因為呢次事件更加作出多個改動，包括搵IT改咗個電腦開單system，仲有終於接受其他付款方法畀維修費（一早應該啦，咩年代呀！），另外，推行多年嘅「員工Referral獎勵制度」都取消埋，所以係影響咗好多人，同事私底下點會唔討論吖，話冇怨言你都唔信啦！
阿君辭職嘅時候，我第一個諗法係同事畀說話佢聽，點知唔係……
我：「大家work咗咁耐，我相信你為人，呢啲有眼睇㗎嘛！你唔使走喎，係咪有其他同事為難你？」
阿君：「唔係呀，同事好好，佢哋喺我面前特登唔提。」
我：「咁咪得囉！IT要搞過system都冇詐型啦！唔使辭職喎，一單還一單，你同你家姐係兩個唔同嘅個體，大家明㗎喇！」
阿君：「唔係同事問題，係我家姐問題，而家晚晚返屋企都有說話聽，家姐叫我唔好再做，話我呢個細妹冇共同進退。」
我：「即係阿Ling唔覺得自己有錯？」
阿君：「佢冇話自己冇錯，不過家姐覺得我仲留喺呢間公司，只會日日聽到同事提返嗰件事，佢唔想影響到兩姐妹感情，全家人每晚食飯都勸我走，日講夜講，我都聽到頂唔順……」
CLS!由阿Ling選擇穿櫃桶底開始，已經係影響緊兩姐妹感情啦！你唔諗下咁樣做會令個妹幾難堪？呢啲唔係普通工作犯錯，監都有得你坐呀！
最令人心寒嘅係，阿君老豆老母知道件事，雖然明知係家姐阿Ling錯，但都幫口叫個妹辭職，因為老人家覺得阿君留低都冇前途，會畀人睇唔起，仲會令人懷疑有份。
我冇批到阿君辭職，叫佢再考慮清楚先，家姐出錯被炒，細妹仲要辭埋份工？呢個咩道理？
不過我都唔知可以hold到阿君幾耐，如果佢過幾日再遞信辭職，唔通我死纏爛打唔畀人走咩！
講咗咁耐，你估下阿Ling咁樣改單一共穿咗幾多錢櫃桶底？
答案係$21,000……
佢total改咗50幾張單，大費周章搞咁多嘢都係呃咗$21,000，呢個行為係足以令阿Ling留案底，仲搞到個妹喺公司無地自容，為咁少錢累己累人值得咩？
A1麵包店嗰單講緊11萬，最後仲要判囚，不過人哋起碼講緊6位數，阿Ling咁樣做唔止冇埋份工，連帶影響介紹佢入嚟做嘅細妹，何必要搞到咁嘅田地呢？