1st in已經見咗HR，今次2nd in就直接見Manager，對方一入房已經好頹好冇精神，打完招呼佢坐低睇我啲reference letter同證書，揭揭下突然唔郁，至少有兩分鐘係望住同一頁紙，嗰張係前公司嘅工作證明，得幾行字，我心諗係咪有咩唔妥呢？
我：「請問……係咪有咩問題？」
個Manager震咗一下，正確嚟講係紮醒……原來佢恰著咗！
Manager：「冇嘢！你介紹下自己先。」佢抬起頭，個樣睡眼惺忪。
咁我可以點？咪照佢意思開始自介囉！呢次個Manager冇再耷低頭，所以我更清楚見到佢合埋眼。
我：「Hello~~」
個Manager又醒返……
之後佢冇再瞓，但整個人嘅狀態迷迷糊糊，成個2nd in唔夠15分鐘。
Manager：「得㗎喇，有消息會通知你。」
我嬲到一句聲都冇出，bye bye都費事講，拎袋企起身就走，呢位Manager應該冇留意到我有不滿，因為佢個樣仲係好迷，懶洋咩咁。
返到屋企思前想後，考慮過打返去畀個HR投訴，諗諗下又好似冇用，唔通個HR會企我呢邊咩，人哋話晒一齊共事，就算打去公司投訴，真係有人會處理？
點估到第二日我收到HR嘅電話：「Hello，Cindy？我哋想同你confirm個offer，如果下星期一返工有冇問題？」
……
個Manager瞓住咁interview，最後請我？
我同男朋友傾過呢件事，男朋友仲火滾過我，佢話一個咁唔尊重人嘅Manager跟唔過，但我唔爭氣，因為手頭上冇其他offer，難聽啲講真係等緊份工開飯，所以我當時好快就答應咗個HR返工。
個人認為，就算對方見工時表現得好熱情，好有禮貌，但最後唔請都係冇意思，無可否認呢個Manager當日嘅行為係好唔尊重，不過佢的確畀咗offer我，咁唔係我最想要嘅結局咩？或者呢個諗法係自我安慰，希望我冇做錯決定啦！