大家有冇做過啲公司係要除鞋先可以入office㗎呢？
年幾前嚟見工已經知㗎喇，個receptionist要我除咗對鞋，換埋拖鞋（佢哋提供）先可以行入去office範圍，即係連candidate都要咁做，我開頭都好唔慣，又唔係日本公司，又唔係Party Room或者和式餐廳，正宗文職，老細仲要係香港人，點解要咁呢？
但係搵食吖嘛，有人請唔通因為要除鞋返工而唔做咩！
唔知呢種風格放喺日本算唔算正常，我之前做過5至6份工，未遇過一間公司係咁，雖然班同事未致於有腳味，但我都用咗一段時間先適應。做落咗聽啲同事講，老細嫌大家啲鞋出過街，會踩污糟地方喎……鞋嘅作用唔係用嚟出街著㗎咩？Office啲地氈好貴㗎？
上個月有位求職者嚟見工，喺門口已經支支佐佐唔願意換拖鞋㗎喇，咁後來為咗要入嚟interview都就範啦，當時大家不以為意，好快就傳嚟一陣刺鼻同濃烈嘅味道，引述返同事嗰一刻講乜：
「咩味呀？好似死老鼠喎！」
「唔係喎，似屎味喎，邊個瀨屎呀？」
「真係似死老鼠呀，我朋友公司試過有死老鼠喺上面啲假天花，臭咗成個星期。」
「一係call管理處上嚟睇睇啦！」
睇返我成個故仔嘅流程，你都估到氣味係來自嗰位求職者嘅腳啦，不過一開頭大家冇諗呢樣，因為難聞氣味係突如其來，直至receptionist行入嚟問同事聞唔聞到，我哋先至確認源頭所在，個求職者入房同老細interview嗰陣，陣味明顯減弱咗，而門口接待處就持續濃烈，點解？因為求職者對鞋喺出面囉！
唔係取笑人哋腳臭，呢啲嘢各有前因，但office密閉環境遇到咁嘅情況真心惡頂，當同事起勢咁討論時，呢位求職者好快就出返嚟，前後應該in咗10分鐘啫，完全唔係我老細一貫in人嘅作風，而求職者行緊去門口嘅時候，死老鼠味加屎味又充斥整個office喇！尾隨出嚟嘅老細單手掩住個鼻，對眼唔知咩事紅晒，有泡眼淚「郎下郎下」冇流落嚟。
好抱歉，公司冇請呢位求職者，但佢絕對係無名英雄，經此一役老細廢除咗入office除鞋嘅傳統，而家每個同事都正常著住鞋咁返工做嘢，舒服晒！
其實當日啲腳臭味唔係來自同事，不過老細改變咗做法，應該係意識到唔係人人適合除鞋入office，講真吖，我哋公司耐唔耐都有求職者、客戶，同埋vendor上嚟，有時外人都覺得換拖鞋好唔自在，畢竟呢個做法喺香港唔常見，我個人就真係唔buy除鞋返工喇！