我同女朋友Kelly傾過去唔去英國，但佢唔多想，主要原因係唔捨得香港嘅親人同埋朋友，特別係佢媽咪。
有一次去Kelly屋企食飯，佢媽咪講笑咁問我：「你點頂得順我個女㗎？又唔識煮飯，又唔做家務。」
Kelly幫我搶答：「請個賓賓咪得囉！」
佢媽咪：「做女仔點都要識少少㗎！你唔好成日大癲大肺啦！要溫柔啲，要學識體貼、要慳家、要有自己事業，唔好等個老公咁大負擔，咁樣啲男仔先會想同你結婚㗎！」
Kelly：「算吧啦，呢啲優點你一個都冇，爸爸娶你係因為你生得靚之嘛！」
佢媽咪面上露出燦爛嘅笑容：「咁你又講得啱。」兩母女感情真係好好。
噚日我同Kelly都work from home，佢嚟咗我屋企，當時電視直播警方見記者，721事件發生咗超過一年都未拉晒啲白衣人，以為夠晒荒謬啦，點知當日嘅受害者喺今時今日竟然變咗被告，捱打嘅場面竟然被形容為勢均力敵，真係完全扭曲晒是非黑白，亦顛倒咗任何一個正常人嘅價值觀。
女朋友突然好認真咁望住我講：「不如我哋走啦，去英國又好，去台灣又好。」
因為佢係一個好鍾意笑，好小事都笑一大餐嘅人，心情突然咁低落，我知佢係認真：「你唔係話唔想走，唔捨得屋企人咩？」
女朋友：「有直播、有片、有相，咁都可以由黑講到白，如果留喺香港，我一定唔會生小朋友，會害死佢。」
我哋都沉默咗落嚟，因為唔知仲可以講咩，而家呢個香港實在令人無語。