本來呢個係YouTube訪問片，但因為受訪者擔心就算聲音經過特別處理都會被認出，所以我哋最終選擇用文字方式紀錄。嚟自香港嘅Ivy（化名）喺日本最大連鎖中古店「大黑屋」工作咗8年，30歲未夠已經係舖頭嘅老臣子，不如你估下佢月薪係幾多？
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
之前喺日本讀書嘅Ivy，第一份正式嘅full time工作就係大黑屋，由於公司嘅市場都好著重遊客，所以非常樂於聘用同時識得廣東話，國語，英語，仲有日語嘅人。
作為女仔，Ivy自言最初返工日日見住啲名牌手袋都會心動，仲曾經睇中一個價值大約200幾萬日圓（約10幾萬港圓）嘅袋，默默咁儲錢買，目標係30歲之前將個袋歸旗下，但而家距離三十大關愈嚟愈近，Ivy反而冇咗呢股衝動，因為每日嘅工作都係對住呢啲奢侈品，真係會麻木同埋冇晒感覺。
Ivy：「噚日先有個大陸遊客嚟買咗隻錶，幾百萬日圓全部係現金，真係唔夠佢哋有錢，雖然唔知佢哋啲錢點嚟。」
我：「張單咁大，佣金係咪好多？點計？」
Ivy：「我哋冇佣分，雖然工作性質係sales，但月薪都係固定，所以唔止我，就連其他日本同事都有一種心態，就係寧願冇客冇咁忙，因為公司做幾多生意都唔會影響我哋收入。」
我：「所以平時都好忙，好多遊客買呢啲咁高價格嘅奢侈品？」
Ivy：「呢排係忙咗少少，但一般情況下都好靜，最忙其實唔係銷售，而係好多遊客會同你吹水，特別係佢知道你識講國語或者廣東話，跟住就會捉住你係咁傾，除咗問有咩好嘅貨之外，最常見係問你有咩景點值得去，噚日用幾百萬買錶嗰個客其實購物過程只係15分鐘，不過就捉住我吹水吹足個半鐘。」
我：「傾咁多唔會畀店長或者同事詐型？」
Ivy：「唔會，大家都係hea底，當然表現出嚟都係好有禮貌，但其實佢哋日本人一樣想hea，始終冇佣，大家顧掂自己嘢就得，日本同事都好好相與。」
唔知大家對日本大黑屋有冇印象？有冇發現大黑屋係有幾隻色？有啲橙色底，有啲黃色底，亦有黑色同藍色底，雖然名字一樣，但背後嘅公司同老闆其實都唔同。
Ivy：「大黑屋呢個名喺日本同神明之類有關，具體我都冇去了解，但就係因為咁，冇人可以將大黑屋三隻字註冊成自己商標，即係邊個都可以用，結果後來就出現咗唔同顏色嘅大黑屋。」
我：「唔同顏色嘅大黑屋，喺品牌地位同埋信譽方面有冇高低之分？」
Ivy：「不如咁講，歷史最悠久係我做緊嘅黃色大黑屋，1947年就已經成立，最早出現喺市場，而我呢間係只賣奢侈品，其他顏色嘅大黑屋就咩都有，酒又賣，新幹線車飛又賣，定位有少少亂，坦白講，好多日本人都分唔清不同顏色大黑屋嘅分別，反而遊客仲知得清楚啲。」
我：「所以你算係喺大黑屋龍頭公司做嘢？」
Ivy：「以前係，而家就算係黃色大黑屋都有啲大不如前，股價跌咗好多，有種跌落神壇嘅感覺，已經畀其他日本嘅中古店超越。」
Ivy口中嘅其他中古店，並唔係指橙色黑色藍色，或者其他顏色嘅大黑屋，而係一啲後起之秀嘅中古店，例如米兵同一風騎士。
Ivy：「米兵同一風騎士嘅社長都係喺我哋嘅大黑屋出身，而家已經青出於藍，因為我哋公司之前盲目開發英國市場，蝕咗35億日圓，所以近年係有種倒退嘅感覺。」
畢竟已經做咗8年，Ivy熟悉日本中古屋市場同埋佢公司嘅背景歷程係好正常，係時候開估佢喺大黑屋有幾錢人工。
我：「8年，每年加少少都應該唔錯啦，而家月薪係幾多？」
Ivy：「月薪係22萬，扣埋稅，實際出落銀行戶口係18萬。」
我：「日圓18萬，而家兌換率即係HKD 9,658？」
Ivy：「我當你七算，都係一萬鬆啲，做咗8年，連續，full time，係咪低得可憐？」
根據Ivy所講，佢呢8年只係加過一次15,000日圓，換言之Ivy最初薪金即係20萬日圓多啲，目前係22萬，實收18萬，仲要日圓係咁創新低，係咩原因令佢做足8年呢？唔通真係好鍾意份工？
我：「如果你出動到可憐呢個詞語，即係你都覺得人工好低，咁點解做咁耐呢？貪份工清閒？」
Ivy：「因為連埋我之前喺度讀書，下年我就嚟咗日本10年，差一年就可以申請永住，頂埋啦！有份工有固定收入當然重要，但你間公司嘅名氣都好重要，其實有香港人叫過我去佢公司返工，但對方喺日本係start-up，喺細公司做嘢唔好話申請永住有難度，就連係開銀行戶口或者租屋都有難度。」
我：「所以就算大黑屋人工低又好，跌落神壇都好，佢仍然係一個日本家傳戶曉嘅名字，有助你申請永住。」
Ivy：「係，所以一拎到永住，我第一件事肯定會轉工，趁到時30歲仲可以轉行，屋企人知我做咗8年，每個月都係得9千幾蚊，成日叫我返香港搵份工仲好，但我唔想，一來我比較鍾意日本生活，二來都住咗9年啦，差一年就10年唔通而家先走咩！」
我：「但我想問下日本同事同外國同事，薪酬待遇係咪一樣？」
Ivy：「一樣，我舖頭有個日本女同事做咗11年，人工都係多我二萬日圓，不過佢同我唔一樣，佢真係鍾意呢份工冇壓力。」
近年聽到唔少講法係話永住比之前難批，首先你間公司有名氣都唔一定過關，月入太低亦可能有影響。無論點都好，希望Ivy可以成功申請永住，因為佢明年6月先啱啱夠10年，永住批核有時動輒要等半年先知結果，如無意外，Ivy最少都要喺大黑屋做到2024年年底，到時再update下佢嘅情況。(完）
情迷下屬親大佬 女上司隨時變阿嫂
https://youtu.be/nWfN74b93a0