兩年前左右，有個叫Suki嘅女下屬向我辭職，循例問下係咩原因？會唔會考慮多陣？然後佢答：「因為我上個月離咗婚！」除咗愕然，我都唔知應該講乜，因為不嬲唔會理下屬嘅私生活，但係我仍然忍唔住問多句：「其實離婚同辭職有咩直接關係？你老公係我哋公司同事？」
Suki：「唔係！我覺得女人真係唔可以靠男人，我要搵多啲錢，呢度得萬幾蚊一個月我儲唔到錢，有個姊妹介紹我做刷單，完成啲任務就得，每日都有錢返，我計過㗎喇，幾分鐘已經賺到幾十至一百蚊，勤力啲做個幾星期就等於呢度做一個月，我寧願全職投入嗰邊，我要賺多啲錢！」
Suki話個姊妹每日都會派「任務」畀佢，例如去某個網站買部榨汁機，$500蚊買，對方轉頭會退返$550，即係撳一個掣，等幾分鐘，咁就賺到50蚊，而呢啲「任務」係有好多嘢可以買，健康產品又得、飾物又得、衫又得，總之每日都有好多賺錢嘅機會。
唔知大家聽唔聽得明Suki講乜，反正我就唔明……
我：「咁點解佢要你買嘢然後又畀返錢你？」
Suki：「因為要刷單吖嘛！刷好評刷熱度，咁個商家先可以賣得更多，你去網購平台買嘢都會睇邊樣最hit最多人買，用呢個做指標，佢哋就係要做呢樣嘢！」
喺Suki解釋之前，我連咩係「刷單」都未聽過，新詞彙？
我：「都係唔明，咁人哋自己買自己啲貨咪得囉，點解要畀錢你賺？」
Suki：「咁啲網購平台系統會識別㗎嘛，你自己買自己嘢就唔計熱度㗎喇，所以佢哋先要出錢請人刷單。」
成件事根本講唔通，即係「我賺夠喇，係時候畀啲錢人賺」呢種？本身唔想理太多，點知Suki補充多句：「我打算將成副身家拎晒出嚟發展呢個事業，賺幾廿蚊呢種貨都係太少，如果買金呀、名牌袋呀、同埋鑽石呢啲，到時一單就係賺幾百至一千蚊，我一定要賺錢多過我前夫，要叻過佢，要威畀佢睇！」
其實我依然keep住唔明Suki講乜，當時又冇咁多呢類新聞，但擁有正常思維嘅人應該唔難察覺「伏味濃」，好有詐騙嘅味道。
Suki並唔係我愛將，工作表現中規中矩啦！如果佢要resign，基本上我唔會攔住，不過大家始終共事咗幾年，作為上司下屬關係又好，同事關係又好，聞到浸徐佢有機會畀人呃錢，我都係決定勒一勒Suki，封辭職信當冇收過，叫佢再諗清楚先，或者會唔會將「刷單」當兼職，咁起碼你有份收入，同埋趁機會勸下佢唔好投入大量金錢，千祈唔好因為離婚而影響咗理智，做咗啲一時之氣嘅衝動決定，話晒大家識得，唔通想睇住佢衰咩！
問題好快就出現，因為我唔批Suki辭職，佢開始不斷搞事，向其他同事話我強人所難，仲越級走去搵老細投訴我，好似仲話搵咗勞工處（同事轉達畀我知，最終我證實唔到），總之短短幾日就搞到滿城風雨，簡單嚟講，Suki覺得我阻住佢發達，覺得我係唔想佢resign所以諸多留難。
結果我畀老細捉咗入房傾，先旨聲明，老細平時好爛口，以下對話係比較粗俗。
老細：「你搞乜L嘢啫？Suki周圍話你唔畀佢辭職，佢要走咪畀佢走囉！一陣佢出去唱9我哋公司呀！」
跟住我就將Suki打算成副身家投入去「刷單」講出嚟，原來Suki向老細投訴我嘅時候已經講咗，所以老細鬧得我仲甘。
老細：「你理L得佢吖！你條女呀？佢要畀人呃都冇辦法，刷單如果咁好搵，個L個去刷啲乜L柒單就得啦！有西人返工咩！呢個係佢自己選擇，你勸一句咪夠囉！你想做英雄拯救全世界呀？或者佢真係會成功呢！」
其實老細講得冇錯，因為公司裡面唔係個個人都知得咁詳細，有部分同事已經傳緊我留難辭職下屬，唔通我又逐個走去解釋咩！
Ok！放人！我仲推前計返Suki向我講辭職嘅日子，應佢要求扣埋啲假，成全佢全心全意去發展咩「刷單」事業。
本身件事過咗咁耐都冇咩好講，但係Suki呢幾個月先後搵過公司幾個舊同事借錢，而且銀碼都唔細，佢同人講係投資失利，又畀人拖數，而家欠出面80幾萬，以我所知就冇人借畀佢，而Suki亦都冇搵我，正常嘅，走嘅時候搞到咁唔愉快，Suki點會搵我吖！
我覺得Suki應該搵到冇人可以搵，先至會選擇call舊同事幫忙，我唔係心涼，只係覺得老細當日好啱，我又唔係英雄，救唔到全世界被騙嘅人，既然勸又勸咗，條路就係對方嘅選擇，做人唔使下下都咁大愛，問心無愧就夠，有時對工作同埋對同事都係唔好投入太多私人感情。