較早前搵到份工，冇錯，人工同福利都好，地點又便利，但係班同事真係好唔友善，問嘢冇人肯答，例如claim form擺邊，咁我新嚟唔知好正常啫，問第一個同事，佢答：「唔知唔知，唔好問我！」
問第二個同事，佢好大聲「褶」咗一下，然後答：「你自己搵下啦！」
好啦！問阿頭，終於肯答喇，但全程好晦氣。
另外一次約個客zoom meeting，因為要預埋阿頭一齊開會，咁都要同佢夾時間㗎嘛，問句幾點得閒啫，阿頭已經著晒火一嘢ban埋嚟：「你有時間就畀我啦！到時唔得閒會同你講，你而家問聽日啲嘢，點答你呀？」
自己可以完成嘅工作我係唔會問，寧願行冤枉路都費事受氣，不過作為一個新人，唔多唔少總有啲嘢要請教同事，而我發覺呢班人唔止對我係咁，佢哋自己互相交流嘅態度都好差，簡單嚟講，成間公司都好重怨氣。
然後我返咗一個月仲未有staff card，因為呢張card係用埋嚟打卡兼出入office，如果我冇，就連行出走廊去廁所都要撳鐘等receptionist開門，咁你正常點會一個月未整好呀？問個Admin，佢叫我問阿頭……迫於無奈走去問，你估阿頭點同我講？
「你覺唔覺自己咁多問題好影響人呀？」
冇card我都忍耐咗一個月啦，問一句啫，平時已經唔敢麻煩大家，點解要咁呢？見工嘅時候明明唔係呢種態度㗎喎！
咁嘅工作環境令我好怕返工，而家考慮緊辭職