唔覺意錫咗一啖 上司約我情人節去街

情人節對我嚟講係充滿不安,聽張學友都係。

當年喺公司被上司明示暗示追求,又公司又上司好亂,我直接開佢名啦,佢叫Andy。

之前都唔覺Andy有啲乜嘢,直至一次喺office食晏,食完之後我就用電腦上網睇劇,忽然有把聲喺我耳邊講嘢,貼到好近,佢講嘢時嘅呼吸吐息直情喺我耳仔吹氣咁滯。

「你都有睇呢套嘢呀?」

我嚇親加上本能反應回頭,嘴唇就唔覺意錫咗落Andy塊面,輕輕hi到一下,然後我已經即刻彈開,不過都禮貌地回答:「哦,係呀,呢套咁紅。」

當時唔肯定Andy真係關心我睇咩劇,定係想警告我唔好喺公司煲劇,始終佢係我上司,可能係想叫我唔好再睇。

嗰次之後,Andy日日買早餐畀我,叫咗佢好多次唔使都唔聽,持續咗一個月左右,直至我話要減肥佢先停止,我亦唯有喺屋企食埋早餐先返。

我哋成班同事間唔中會出去飲嘢唱K,有時會猜枚劈酒做啲好MK嘅嘢,然後Andy會幫我頂酒,我開始覺得佢對我有啲唔同,個個都有輸,個個都要飲,佢淨係幫我頂酒。

有時Andy會夜晚msg我,同我傾心事,講下啲無謂嘢,最癲係……佢試過錄音唱歌畀我聽,好記得佢唱咩,係張學友嘅「有著我便有著你,真愛是永不死」,我聽咗兩句就冇辦法聽落去,因為毛管戙,亦係呢個原因,我冇再聽張學友,一聽到就諗起Andy。

Andy又冇咩過份行為嘅,未致於好滋擾,直至我的起心肝轉工,佢嘅行動就開始進取。

其實想轉工好耐,呢間公司太細,人工唔高,一早想邊做邊搵,但你知每個人都好鍾意留喺comfort zone,所以我做咗接近兩年先積極再搵,亦好好彩經agency搵到另一份。

因為公司冇雙糧冇花紅,我係2月遞辭職信,記得嗰陣時年初一係2月16號,早兩日就係情人節,可能係我即將要走嘅緣故,Andy忽然鼓起勇氣直接出招,但係個理由好老土,佢話有個女鍾意佢,而佢唔鍾意對方,希望我可以幫幫手,佢冇講到實則要點幫,淨係問我2月14情人節可唔可以一齊食dinner:「你介唔介意先?幫幫手,我真係唔鍾意嗰個女仔。」

我大約估到佢想用邊招,應該係想我做佢另一半,等個女仔死咗條心之類,所以我亦好機警咁答:「你唔想煩,不如直接同佢講清楚啦。」由於我哋當時係msg講緊呢件事,連隨我就話有嘢整緊,再傾。

Andy面皮算好薄,我拒絕幫佢之後,Andy亦明顯保持返距離,或者係feel到我落咗閘,仲好啦,大家識做唔使煩。

我絕對尊重同性戀愛,身邊亦有hehe friend,不過唔排斥並唔代表我鍾意男人,我100%鍾意女人,更加鍾意大波長腿學生妹OL,我而家已經有女朋友喇,但係呢兩年每次講起張學友同情人節,我都會諗起Andy。

可能陰影太大,我會將同女朋友嘅合照set做電話wallpaper,WhatsApp頭像都係用女友合照,女友以為我好鍾意佢,其實唔係,純粹係陰影問題。

投稿讀者:William

error: