公司早排發生咗單嘢，班同事分成兩派，一邊撐Chloe，一邊撐Emma，先介紹下呢兩位主角先，Chloe老公因為去咗多倫多工作，所以佢嫁雞隨雞，辭職過埋去多倫多陪老公，但因為我哋公司搵唔到合適嘅人選取代Chloe，所以老細就問Chloe介唔介意喺多倫多繼續兼做，畢竟之前疫情大家都慣咗work from home模式，Chloe去到加拿大咪當home office囉！
據講公司曾經同Chloe傾過，好唔好以part time或者freelance方式去計糧，不過做落又發覺工作量同以前返full time差唔多，而且雖然有時差，香港晏晝已經係多倫多凌晨，但Chloe又的確冇甩漏，我香港時間下午3,4點send電郵，見到Chloe都有照覆。
跟住介紹Emma喇，佢睇唔過眼Chloe可以用呢種模式繼續返工，成日都同我哋講：「咁咪好唔公平？之前work from home還work from home吖，而家全世界都要返office，我返公司都要成本㗎，搭車食飯呢！哦，佢就照出full time糧，公司唔使返，衫唔使換，妝唔使化，車唔使搭，咁個個話另一半relocate去第二度都得啦，成個office嘅人work from home咪得囉！」
件事大約就係咁，所以公司慢慢地分割成兩派，有人認為Chloe做得掂啲嘢，冇拖累同事就得，話之佢去咗加拿大定係非洲，另一派就梗係覺得Emma有道理，甚至覺得公司大細超。
我唔知Emma同Chloe之間本身有冇私怨，亦唔知老細係咪真係優待Chloe，只知道Emma決定報復式爭取同Chloe一樣，即係唔使出現喺office，以work from home形式繼續做嘢，繼續逗而家份糧。
Emma同公司講，佢老公都要relocate去美國，所以佢要求學Chloe咁樣返工，但係同一時間，Emma又周圍同人講其實佢老公根本唔使去美國，咁樣做只係追求平等待遇，所以Emma嘅直屬上司同埋老細係一開始已經知道佢玩嘢。
後來老細就叫Emma提供佢老公要去美國工作嘅證明，咁Emma肯定畀唔出，亦都唔會畀，佢話除非當日Chloe都有提供個老公嘅工作證明，否則淨係問佢拎就係大細超。
呢單嘢一直爭持不下，Emma嘅行為亦都愈嚟愈激，佢調返轉畀deadline公司，到咗嗰一日，Emma真係唔再返office，不過照覆email照做公司嘢，仲呼籲同事跟佢一樣，因為冇理由批Chloe咁做，其他人就唔批，又話有咩事就去勞工處解決，甚至要去平機會投訴。
雖然有班人言語同態度上撐Emma，不過冇同事跟佢咁做，始終每個人追求嘅嘢都唔一樣，有人覺得唔需要同Chloe比較，自己做好份內事就得，亦有人認為Chloe單嘢係公司主動提出，唔係Chloe要求咁樣返工，請唔到人代Chloe亦正正反映佢嘅工作暫時冇人取代到，呢個係能力嘅表現，你有料嘅話，老細一樣會答應，所以係員工價值問題，唔係大細超問題。
我認為唔係每個人都enjoy work from home，以自己為例，我一家七口，家姐姐夫雖然office hour都要出去返工，但佢對仔女仲細，平時喺屋企都真係幾嘈下，我阿爸阿媽又會不斷同我講嘢，所以你畀我揀，我寧願返office，起碼空間感大啲，感覺自在啲。
公司方面，唯有死死地氣搵Chloe，叫佢提供返老公要去加拿大工作嘅證明文件，Chloe畀完之後，公司就要求Emma做返一樣嘅嘢，但係都講咗啦，Emma老公根本就唔使去美國，佢純粹搞對抗，咁當然冇Chloe老公嗰啲公司信同埋入境文件啦，結果公司就炒咗Emma喇！
咁究竟Emma會唔會有進一步行動，例如去勞工處或者平機會告我哋公司呢？現階段可能言之尚早，可能要遲一排先知，不過有另一件事就肯定咗，就係Chloe已經主動提出唔做，佢唔想自己遙距work from home嘅工作模式，會成為其他同事心目中條刺。
真心講句，Chloe係幫到手，之前佢人在加拿大，冇出現喺office，但我喺工作上煩少好多嘢，所以某程度上Chloe work from home係對我冇影響，佢唔做先至對我大影響。
至於Emma，我因為工作上比較少同佢交手，唔評論佢做嘢得唔得，亦明白佢谷氣個位係乜，Emma都係追求公平待遇啫，只係預告會作故仔去美國呢個行為有少少激進，或者佢低調地同公司傾work from home，老細肯批亦唔出奇，但Emma擺明要畀公司知佢復仇，咁真係好難搞。
最後大家都冇得做，兩個一齊走晒，何苦呢？