同女友出咗中環整少少嘢，期間因為太熱太攰，見到有餐廳就盲舂舂入咗去，坐低望一望份Menu~~~~~仆你個街！食個Lunch要成千蚊一位？！
我哋兩個呆一呆，侍應已經行咗埋嚟，女友突然同我講：「係咪漏咗啲嘢？」
侍應望一望我，我答：「係呀，返去拎返先。」
起身向侍應連聲致歉，跟住步出餐廳。
我哋兩條友行出去之後笑到傻咗，女友畀公司迫放無薪假，我公司就因為好耐冇event，而家只能靠一份底薪，老細仲放風要轉玩視像speed dating，否則隨時捱唔住，所以我同女友都為咗工作同收入好煩惱，成千蚊一個lunch唔係呢間餐廳嘅問題，只係我哋暫時食唔起。
一段好嘅關係，會互相明白同埋體諒，可以一齊面對喜怒哀樂，就算係落泊嘅時候都一樣可以做自己，唔需要掩飾或者怕尷尬，慶幸有一個可以同我分享一切嘅人，而唔係多咗一段令我覺得疲倦嘅關係。❤️