公司有個管理級職位懸空咗好耐都請唔到人，結果嗌咗獵頭喺英國搵，再安排視像見面，其實first in係我同另一位Manager負責，但當日老細知我哋會隔空interview，臨時臨急話要一齊參與，即係嗰位英國求職者會用視像1 vs 3咁樣見工。
老細開完cam之後同對方say咗hello，跟住就由我同Manager主持大局，你聽還聽吖，唔好插嘴吖嘛！
老細：「呢條鬼佬咁搞笑嘅，我哋香港個個都爭住去英國，佢就想由英國嚟香港做嘢，係咪嗰邊撈唔掂呀？你哋問清楚佢喎，呢個用獵頭搵要畀佣金，一陣請咗個冇料嘅返嚟點算呀？有冇同條鬼佬講housing㗎？到時唔係佢想租邊度就邊度，津貼有上限㗎！呢啲嘢你哋直接同條鬼佬講，費事個獵頭講漏，英國鬼特別麻煩，好多食屎狗！」
我：「呀……老細……」
未等我講完，視像另一邊嘅英國求職者已經用流利廣東話作答：「因為我太太係香港人，佢屋企人喺香港，所以我唔介意從英國過嚟做嘢，你放心，我唔係食屎狗。」
好瘀呀！特別係呢位英國求職者冇發脾氣，臨尾仲識講笑話自己唔係食屎狗，雖然嗰堆咁唔大體嘅說話並非出自我同Manager把口，不過我哋兩個都覺得好丟架好尷尬，老細聽完就好似食咗啞藥咁，成個interview冇再出聲。
因為呢round interview係冇預老細一齊見，佢手上係冇CV，失驚無神要join都算㗎喇，視像完結之後佢仲想怪我……
老細：「你又話佢係獵頭喺英國搵嚟嘅，識廣東話你早講吖嘛！」
呀老細，個求職者而家份工喺英國啫，但佢嘅人生有過往㗎嘛！人哋疫情前喺香港工作同生活超過8年（所以先識到個香港太太），後來返咗倫敦，佢啲廣東話同美藉香港藝人布偉傑差唔多水平，識聽識講，你柒少陣啦！