「跟唔跟我去倫敦？可以順便睇場英超。」當時老細係咁樣同我講，聽到都扯旗啦！講明先，我係仔，老細係麻甩佬，而且我百份百肯定大家都鍾意女人，平時我哋仲會講下波經，我扯係因為出差有得免費旅行兼睇波啫，千祈唔到諗到到咁複雜。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
基於免費旅行寓工作於娛樂，我半秒都冇猶疑就答應咗一齊出差，完全冇深究任何細節，淨係知道5日4夜的行程裡面會見3個客，而且都係當地嘅office hour日頭時間，換言之夜晚自由活動，可以周圍行下，照計就輕鬆過留喺香港。
不過我真係太天真太傻喇，首先係冇所謂嘅自由活動時間，因為老細一早mark低餐廳同景點要去（佢事前冇講），全部都預埋我，頭一兩晚都開心嘅，始終有人請食飯，一蚊都唔使出，但係你4晚要對住老細，連唞氣位都冇，第三晚已經灰灰地。
食飯呢啲小事，由於時差嘅關係，我哋每晚都要同香港呢邊溝通做一啲paperwork，變相喺倫敦晚晚深夜先有得瞓，然後一早就要爬起身去見客，咁都未算，因為老細只係book一間雙床房，可能係見大家都男人冇所謂啦，唔使book兩間房咁浪費，不過老細例牌會瞓先，而佢嘅鼻鼾聲仲響過火車，莫講話做唔到嘢，我連入睡都好困難。
然後我發覺老細嘅個人衛生好有問題，喺倫敦total 4晚，有3晚佢係唔沖涼，老細話自己冇出汗喎！！！
點樣冇出汗呀？雖然唔似得香港咁焗咁悶熱，但每日行咁多路都會有汗啩！而家時溫係零下咩？
老細喺酒店真係唔洗頭唔沖涼，出到街可能冇咁覺，不過喺酒店房咁細嘅範圍，我的確聞到老細個身有少少味，有種佬味，唔係讚人好型嗰種佬味，而係個身有陣味，少少酸醙，唔可以話好多，但聞到囉！
我都分唔清陣酸醙味係來自佢個身、佢個頭，抑或係佢啲衫，因為佢去倫敦都係細行李箱，衫都唔多套，淨係見客會披返件斯文外套，唉！咁應該連底褲都冇換啦！
有一日我哋朝早勁趕，因為老細遲咗起身，我哋出發去一個地方嗰陣要過馬路，條友竟然屌鳩我老遠行去紅綠燈位好嘥時間，要喺路中間橫過！喂，你亂過馬路都算喇，大佬嗰度幾條行車線，巴士又有貨車又有，點過呀？
最後我勸掂佢過紅綠燈，仲要係咁畀佢埋怨我搞到遲晒，你自己準時起身準時離開酒店咪唔會遲囉！
咁可以點吖？我都要默默啞忍啦，打份工預咗，仲要人在倫敦，唔通我又發返你脾氣咩！況且睇場英超佢仲講十幾次，呢個恩惠真係貴。
有一晚終於疉住香港星期六，唔使英國時間半夜做嘢，但係老細第二朝plan咗地方一齊去，又book咗地方食lunch，咁好啦，大家早瞓，呢晚老虎蟹都衝上床瞓先，因為我瞓著咗仲有「一線生機」聽唔到佢鼻鼾，調返轉佢瞓先就認真難頂，我晚晚都要好長時間先瞓到。
OK啦！嗰晚策略成功，始終呢次行程都幾攰，但係第二朝我起身嘅時候，發覺一張開眼就有啲濛，係白濛濛一片，又睇唔清楚嘢。
我坐咗起身，可能係個人清醒咗，開始feel到面上有張紙，一手扯落嚟睇，原來係酒店房嘅信紙，上面寫住「8:30叫醒我，唔該！叫多幾次！Thank you！」
係老細留畀我嘅message，咁你擺枱面或者張床隔隔籬咪得囉！點解要貼喺我額頭呀？完全幻想到我未起身嘅時候，就好似嗰啲被封印嘅屍體咁樣，原來我就係咁樣瞓咗一晚，我竟然呼吸到。
到咗8:30叫醒老細，等佢刷完牙洗完面，我真係忍唔住問：「點解要貼張紙喺我額頭呢？」
老細答得好輕描淡寫：「擺枱面一陣驚你睇唔到吖嘛，嗌過你幾次又瞓咗，廢事嘈親你啦！」
唉！出trip其實冇問題，同老細出trip先係大問題，呢5日4夜除咗入場睇英超比較開心之外，其餘時間都忍受佢嘅個人衛生情況、鼻鼾、做嘢大安旨意，去旅行都係同自己friend開心啲，搞唔掂，英超波飛我仲買得起，下次出差唔使預我。（完）
情迷下屬親大佬 女上司隨時變阿嫂
https://youtu.be/nWfN74b93a0