人情世故，真係教唔到你咁多。
有個新人返咗工個幾月，可能覺得同事易相處好nice，所以開始毫無避忌咁喺office…..溫書，強調多一點，係office hour！
呢位新人話自己學緊日文，平時攤晒啲《大家的日本語》教科書、作業，仲有一張張嘅A4紙notes出嚟讀，真係鋪晒喺張枱上面，佢更加會讀出聲：パン屋や本屋があります、教室に先生がいます、机の上に教科書があります……
因為我讀過日文，相信佢而家學緊啲動詞同埋並列助詞，不過重點係大家都提過呢位新人唔好咁張揚，始終呢度係公司，唔係學校，亦唔係自修室，點知新人唔聽勸告，仲同我哋講：「怕咩啫？上次老闆都見到，佢仲走埋嚟關心我係咪學緊日文。」
聽到呢句都知咩事啦，點會咁唔醒目㗎？
早兩日老闆又見到呢位新人用盡一切資源讀日文，當時係下午4:30左右，新人張枱又係鋪滿notes，電腦個畫面更加開埋日文字典，老闆行埋佢身後笑住講：「讀成點呀？」
個新人真係好意思答：「動詞難記啲囉，又要分一二三類。」
第二日，新人被告知唔過試用期，可以執包袱，佢而家可以專心學日文喇。
最正係新人臨走前向我哋呻，話老闆好假，唔鍾意可以直接鬧，又要扮關心又唔畀佢過試用期喎！
唔係每個人做嘢嘅方式都一味鬧人，而且角色唔同，處事手法都唔一樣，例如我哋呢啲平輩同事，早前已經一而再，再而三叫佢唔好咁張揚，但佢唔聽，老闆出到聲問你「係咪學緊日文」，又問「學成點」，其實係office hour見你大模廝樣溫書，所以用婉轉嘅方式向你發出警號，咁大個人下下要鬧就無癮啦！如果咁都唔醒水，又唔識睇眉頭眼額，其他人幫得你幾多吖！