同事返工自言自語 對死物講嘢發脾氣

KK:「如果阿健呢一兩年先入嚟做,可能佢會做得耐啲。」

我:「點解?」

KK:「因為呢段時間一直要戴口罩,其他人未必會發覺佢自言自語,咁佢自在啲,自然就會做耐啲。」

我:「可能係,唔知佢而家點呢?」

阿健係我嘅舊同事,佢以前坐喺我同KK隔籬,性格比較內向,好少同人傾偈,但就好鍾意同自己傾偈,或者係同死物傾偈。

初初佢入嚟做嗰陣我都唔為意,因為我自己做嘢都做到入晒神,突然會聽到阿健係咁不斷講嘢,我仲以為佢同KK傾偈,但原來唔係,同樣地,KK又以為佢同我傾偈。

阿健自言自語嘅內容係無定向風,有時係講工作,有時係講生活,但唔係同我哋分享,例如聽過佢講:「一陣食咩好呢?」唔夠1秒鐘,佢又會答返自己:「唔食雲吞麵啦,得幾粒咁少都唔夠飽,去鋸扒好唔好呢?」其實我想主動話不如一齊食,但係我都未開得切口,阿健已經自己答返自己:「食焗豬食焗豬,要早啲去,費事冇位。」

每日如是,基本上全日係未停過咁樣自問自答,反而我同KK主動撩阿健講嘢,佢就會靜咗落嚟,感覺係被發現,刻意要收斂,然後隔一陣再開始自己講嘢。

阿健仲會好認真咁同死物講嘢,有次佢跌咗支原子筆,一路彎低腰一路講:「妖,你可唔可以生性啲呀!」執完上嚟之後,阿健會望住支筆訓話:「唔好搞事喇ok?我仲有好多嘢做㗎,唔好蝦我啦,你知唔知原子筆嘅功用係咩?係輔助人工作,偏偏你就阻住人工作,跌斷墨都搞到我㗎,又要再拎過,到時我又畀人話㗎喇。」

我同KK仲見證住阿健同電腦Mon、膠紙座、螢光筆、Keyboard、Mouse……等等嘅死物講嘢,驚就唔驚嘅,不過某啲場合就帶嚟困擾,我哋份工經常要打電話出去,阿健喺隔籬不斷講不斷講,的確會搞到聽唔清楚電話另一邊講乜,同埋好易分心。

後來發現阿健自言自語嘅人愈嚟愈多,有同事仲會向我同KK八卦,日子耐咗,office就愈嚟多傳聞,有人傳阿健精神有問題,有人話放工見過阿健喺公司樓下來回踱步,好似漏咗嘢想返上嚟拎,行幾步又折返繼續走,走幾步又返轉頭,來來回回重複呢個動作。

我好想幫阿健,但唔知點幫,大家嘅關係又未去到傾咁認真嘅話題,我同KK都怕佢介意。我甚至反問自己,會唔會自己平時都係咁呢?我喺屋企打機一樣會自言自語,算唔算一樣呢?

有一次,隔籬部門個同事行埋嚟搵我講嘢,佢望到阿健自言自語,諗都唔諗就直接對住阿健講:「你成日自己同自己講嘢做乜鬼啫?初初我以為你戴咗hands-free,咁搞笑嘅你,係咪靠腦電波接收㗎?」

KK即刻幫阿健反駁:「關你鬼事咩!」總算制止咗更尷尬嘅場面出現。

當日阿健冇再自言自語,但係第二日阿健亦冇再返工,聽HR講,佢朝早打返嚟辭職,問咗點解不過冇正面回答,我反而諗到另一個問題:「要一個月通知喎,即刻走咪要賠錢囉。」HR好好人,因為聽過其他同事講阿健,所以HR私下請示咗老闆,唔需要阿健賠一個月人工。

我同KK隔咗咁耐再提起,係因為我頭先同個客傾完電話,收線後都自言自語講咗句:「痴線,講價就去街市啦!」我覺得每個人總有自言自語嘅時候,只係阿健比較嚴重啲,我知佢都唔想,但又唔知點幫佢,希望阿健而家嘅情況有改善啦!

投稿:Herman

=====

Follow 咗我哋個IGLinkedIn 未呀?❤️

error: