我條team有個同事叫Karen，早過我入嚟做，同佢唔算friend，但係一向都相安無事，後來唔知點解佢突然對我態度勁差，第一次feel到有惡意係我發高燒請假，第日返嚟Karen喺所有人面前話我扮病，目的係唔想開會……公司日日開會喎！依照呢個邏輯，我咪永遠唔可以請sick leave？Karen自己都有sick leave㗎，佢請就得？
跟住有次公司gathering我唔得閒去，因為好早之前已經買咗演唱會飛，呢個Karen又當住所有人面前話我唔合群，反而係阿姐幫口，話換轉係佢都會揀睇演唱會，仲話gathering成日都有，去少一次半次冇所謂，諗返真係好笑，阿姐唔介意，竟然係一個同我平起平坐嘅同事指責我唔合群。
又有一次我哋team叫外賣，當時我同個客講緊電話仲未收到線，公事嚟㗎！呢個Karen又喺我隔籬講：「唔使理Sharon啦！等得佢嚟都蚊瞓，一陣Sharon另外叫外賣咪得囉！」雖然我講緊電話，不過你企我側邊咁大聲，唔會以為我聽唔到啩，你係特登講畀我聽啦！
仲有次我真係著咗，有客send email嚟enquiry，因為cc好多人，所以Karen都知，留意返，佢嘅職位同我一樣咁高咁大，但就無端端鬧我：「喂！個客問嘢你就覆啦！拖到幾時呀？」Karen係有心要畀全部人聽到，而且語氣好差，我勁嬲咁同佢講：「個客5分鐘前先問咋喎，秒覆呀？我有其他嘢做緊㗎！」
私下同阿姐傾過呢個問題，我話唔知咩事得罪Karen，唔明點解一場同事要搞到關係咁差，因為Karen係連招呼都唔會同我打，我同佢講早晨亦唔會應，基本禮儀都冇。
唔止一次我直情見到佢睥我，心諗咩事呀？呢間公司冇得上位㗎喎！我冇諗過升職，呢度亦冇空間升職，工作上就更加冇踩到你啦！
阿姐好似想刻意淡化，係咁同我講「無嘢嘅，無嘢嘅！」點會冇嘢呀？連其他唔關事嘅Department都有人睇得出Karen好憎我，阿姐你日日見到咁嘅情況都話冇嘢？大家成年人啦，有咩事咪開心見誠講囉！老細都未畀氣我受，但我要睇Karen面色？
後來情況持續惡化，平日自己team食lunch直頭玩到有你冇我，只要我一齊食，Karen就唔會去，但有時我約咗其他人食晏，Karen見我唔喺度就會join食lunch，同事間甚至會講笑：「Sharon你今日一齊食，咁即係Karen唔去啦！」所以嗰種不和同埋針對已經浮晒上面。
因為我唔想日日返工都受罪，其實公司裡面有個人咁憎自己真係好難受，所以我曾經傻到想轉工，希望換個新環境，不過又會覺得自己冇做錯，份工又唔係有咩問題，因為呢個Karen而夾硬轉工好似好無謂，總之呢種想走又唔甘心走嘅心情持續咗好耐，自己心態上好拉鋸。
出乎意料地，Karen上個月遞咗辭職信，Sorry我真係唔想掩飾內心嘅興奮，但伴隨住都有好多難堪嘅事情要經歷，首先farewell餐飯佢講到明唔想我出席，佢係分別同阿姐同埋幾個同事講，搞到佢哋轉告畀我聽嘅時候都覺得唔好意思……
冇錯，我唔care出唔出席Karen嘅farewell飯，唔去仲開心添，只係有個人講到明唔想我出現，多少會有啲難堪。
緊接就係Karen派散水餅，佢逐個逐個行埋去派，淨係skip我，其實個場面係好肉酸，理論上應該係佢覺得樣衰，但依然係嗰句，呢種行為發生喺成年人世界裡面，我始終會覺得不是味兒。
好衰唔衰，就係佢last day派散水餅當日，我喺洗手間撞到佢，Karen行入嚟已經睥咗我一下，咁既然你走喇，不如我終極攤牌啦！直接啲問清楚，反正大家唔會再見。
我：「其實你咩事咁憎我？」
Karen初時唔應，想直接走入廁格。
我：「有咩咪直接講囉！幾時得罪過你呢？」
Karen終於回應，佢擰轉頭同我講：「因為你邪住我呀！就係睇你唔順眼！」
我：「咩邪住你呀？」
Karen：「費事同你講，點解要同你交代呀？」然後佢就入咗廁格，我哋嘅對話亦完結。
Karen last day之後我再同阿姐講呢件事，原來阿姐一早知道來龍去脈，不過一直冇講畀我聽。
阿姐：「好無聊㗎！Karen同我講，有朋友介紹咗個師父畀佢，師父話公司裡面有個同事剋住佢，Karen根據生肖、入職時間，仲有你係女人呢幾樣嘢，斷定你就係師父口中嘅剋星，會影響佢健康狀況同埋家宅平安，佢好迷信㗎！」
我：「唔係啩！呢啲嘢都好信？咁樣當我係剋星？」
阿姐：「佢話個師父好準，我都勸過佢唔好咁迷信。」
我：「會唔會有其他原因呀？例如工作上得罪過佢，唔怕講喎！我一定會檢討。」
阿姐：「唔係呀！真係呢個原因！所以你之前問過我，當時我都唔知點解釋畀你聽，我都覺得好無稽，講畀你聽都唔會改變㗎啦！佢轉工都係因為你咋！」
咁我明點解Karen喺洗手間話我邪住佢喇！如果呢個真係唯一嘅原因令佢咁憎我，我只可以講：「Karen你好白痴！」祝福說話我講唔出口，因為你喺公司畀咗好多hard time我，聽個唔知咩師父講兩句就去針對同事，人哋辛苦，你自己仲辛苦！下一份工記得問晒班新同事幾多歲？咩年出世？怕你掌握唔到生肖資料，師父算唔到下個剋星呀！