「唔係喎！Aesop好貴喎！有冇平啲呀？CK得唔得，好似二百幾蚊咋，Sunny有臭味啫，冇理由要我哋咁多人一齊負擔吖！」同事商量緊夾錢買邊隻香水送畀Sunny，呢一part已經傾咗成個禮拜，講到要出錢就好難取得共識。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
夏日可能為大地帶嚟美腿，但同時亦為日常生活帶嚟汗臭，例如我同事Sunny咁，每次佢一行過就會有陣好強嘅汗臭酸餿味，我明白佢都唔想，因為肝腺分泌係天生，並非Sunny想控制就控制到，不過其他同事覺得難受亦係不爭嘅事實。
其實Sunny亦都為咗呢個問題同人嘈過交，當時有個同事因為用手「鍊」咗個鼻一下，Sunny即刻成個人著晒火：「你有冇禮貌㗎！有汗味我想㗎？港鐵站行過嚟公司要成10分鐘，你唔會出汗㗎？一係你叫老細搬近啲港鐵站囉！」
畀佢鬧嘅同事咁樣回應：「喂，我咩都冇講喎，咁都叫冇禮貌呀？」
Sunny：「冇講冇講，咁你鍊住個鼻望我做咩呀？你咁嫌棄咪唔好喺度做囉！唔通流汗係我錯呀？」
因為工作問題同同事結怨就聽得多，因為汗味臭味而鬧交我都係第一次見，而家Sunny同呢位同事都係面左左㗎！
聽講坐Sunny隔籬位個女同事都要求過調位，但office根本就冇其他吉位可以揀，所以個女仔係習慣性搽啲香水喺自己個鼻哥窿前面，即係人中嗰個位。
自從Sunny同人嘈交單嘢之後，其他同事都覺得多一事不如少一事，天氣比較涼快嘅日子就最開心， 大家甚至已經淡忘，不過你都知啦，香港有幾多日會涼快吖，而家踏入夏天，問題又再出現喇，同埋嗰陣味真係會搞到人好唔舒服。
有冇試過搭公共交通工具時，遇到側邊有啲人好大汗味或者有體臭？一程車或者一剎那都難頂啦！何況我哋同Sunny仲係同事，朝9晚6喺office硬食，佢真係一行過就會隨處飄散，當你身處其中每星期要忍受5日，就唔會再企喺道德高地話我哋班同事㗎喇，因為針唔桔到肉係唔會知痛。
坊間有好多香水同埋止汗劑，我唔明白點解Sunny冇去嘗試，就算你好憎公司啲人，認為唔值得為同事去改變，咁你都會有出面啲朋友㗎嘛，你平時出去食飯都要面對街外人，與其發火鬧人，不如諗辦法去修正，咁樣對自己都係好事吖！
就好似榴槤咁，冇法例話食榴槤係犯法，公司份contract都冇白紙黑字打住唔畀帶榴槤返公司，你可以咁做，仲可以大大聲鬧返人哋干涉你個人自由，不過喺社會生存，有啲嘢應該要有共識，你汗味好大固然冇錯，只係可唔可以為其他人設想呢？
傾咗一段時間，最終班人都係唔捨得夾錢買Aesop，佢哋話貴喎！然後就去咗連鎖化妝用品店買支CK，咁又真係平好多嘅，而且呢隻CK嘅味道係比較強，加上last到嘅時間耐啲，相信送畀Sunny會好適合。
問題係……邊個送？用咩藉口送？
從上次佢鬧同事單嘢可見，Sunny嘅自尊心係好強，咁持平講句，唔止Sunny嘅，換轉有人話我有體臭然後煞有介事咁送支香水畀我，我都會好難接受啦！
我：「出聲係衰，但唔講又好辛苦」
另一位有份夾錢買CK香水嘅同事：「你識咁諗就好喇，交晒畀你，記得叫Sunny每日都用。」
我：「傻㗎你！我咁講唔代表要走出嚟做醜人囉！一係包剪揼，一係畫鬼腳。」
人選可以包剪揼或者畫鬼腳聽天由命，但係無啦啦送支香水畀Sunny嘅動機就真係未諗到，又唔係annual dinner抽禮物，又唔知Sunny幾時生日，九唔搭八送支香水畀佢好突兀囉！
最終我哋達成共識，就係當有人收到份禮物唔想要，你推我讓之下就遞去畀Sunny，可惜個結果係……
我：「喂Sunny，有個friend送，但我唔用呢個牌子㗎，佢哋又用開其他，醒你！」
好在Sunny冇發火，但係佢話：「我都唔用香水嘅，乸型先用，唔要！」
唉！點會乸型先用香水呀，好在唔係買Aesop咁貴咋，但Sunny死都唔肯用，有冇計呀？集思廣益幫幫手啦，我哋唔想成個夏天都咁難受呀！（完）