心理變態呢啲真係冇得解釋，我老細好鍾意留難攞假嘅同事，佢真係好賤㗎！例如頭大半年你要拎大假，老細永遠阿芝阿佐唔願批，攞10日8日又唔情願，攞4至5日又牙痛咁聲，就算攞兩三日都唔畀人疊住其他紅日，我講埋佢心嗰句啦好冇：最好大家唔好放大假！
但係你份工本身就有大假，點都要畀人放㗎嘛！所以去到10月打後佢就會催同事嗱嗱聲放埋啲假，係咁警告大假唔可以累積，但又唔畀啲同事疊埋一齊放，唔想公司突然少兩個人，其實都痴孖根，人係咁多，假又咁多，一個月就得30日，咁多條件你想同事點樣放晒呢？
話得老細係心理變態梗係唔止咁少嘢啦！只要邊個同事即將放假，佢就會畀好多嘢呢位同事做，好似覺得唔做返你夠本會好蝕底咁樣。
老細仲有鋪「騷擾放假同事癮」，即係嗰樣嘢明明搵其他人可以解決，佢硬係要搵放緊假嗰位同事去處理，就算唔係要人做，佢都要問呢問路，總之等你放假都放得唔安樂。
上星期我哋有個同事放假去紐約探屋企人，有日晏晝老細突然要搵佢，仲要我打電話去問嘢，睇返個time zone，人哋嗰陣係紐約凌晨3點，究竟有咩咁大件事要即刻call個同事呢？
「你幫我打去問下Doris，上次Felix Chan壇嘢最後傾到邊？」
我：「Felix Chan仲有其他同事跟，一係問咗其他同事先囉！」
「問Doris吖！佢清楚啲，一陣其他人個版本唔係最新咪麻煩？佢好似放假之前有搵過Felix㗎嘛！」
信我吖！跟咗呢個老細咁耐，絕對清楚佢嘅為人，根本呢單嘢唔需要Doris就可以解決，佢偏偏要趁人放假煩住人，因為類似嘅事都發生過喺我身上，有次我同男友去歐洲旅行，天未光已經收到另一個同事打嚟，個同事口震震咁同我講：「Sorry呀！老細一定要我打畀你，佢想問黃生張單點？」
真係嬲到把幾火，黃生張單一早搞完啦！機都入埋，close晒file㗎喇！你不如直接打嚟問我食咗飯未？或者旅行玩得開唔開心？咁我都冇咁嬲，你問埋啲無關痛癢嘅嘢，影響我放假同旅行嘅心情！
我明白幫手打嚟嘅同事係無辜，肯定係老細迫佢打，因為今次老細叫我打畀Doris都係咁……
我：「一係夜啲或者聽朝幫你問啦！Doris而家喺美國，嗰邊凌晨3點幾喎！」
「咁佢係美國人咩？香港而家晏晝喎！或者佢唔適應時差未瞓呢！」
老細精呀！自己唔打叫我打，結果我趁佢行開即刻打畀Doris，第一次響都未響就收線，另一次就響咗一下，希望冇嘈醒Doris啦！
好在又真係冇事，起碼Doris冇call back我，然後我拎住手提電話個紀錄畀老細睇：「嗱！打咗兩次，冇人聽，應該真係瞓咗！」
「去旅行咁早瞓咗？是但啦！你send個WhatsApp又好，出個email又好，問下單嘢最後跟成點？」
搵第二個問啦人渣！公司係咪冇咗Doris唔得呀？所以我形容老細係心理變態真係一啲都唔過份。
本來冇咗件事，但係去到香港時間夜晚，Doris自己send咗WhatsApp畀我，佢話見到有一個missed call，但因為瞓咗完全聽唔到，我話唔緊要，直接講就係想佢聽唔到，所以先會響一下收線，原來另一次響都未響就收線，佢係連missed call都見唔到。
既然Doris醒咗，我就講下發生咩事，表明立場係老細迫我打畀佢，Doris聽完之後話：「清楚，識做！」
第二日返到公司，老細又問我搵唔搵到Doris？原來Doris聽完我講之後，特登揀香港凌晨時間4點幾打畀老細，響咗好耐，等到老細一聽電話就收線，跟住去到香港凌晨5點幾，Doris又再打畀老細，呢次都係一樣，老細一聽即收線。
見老細覆述返件事都咁唔耐煩，咁我就問：「Doris嘈醒你呀？咁你仲叫我再搵佢？」
「唔係呀，你叫佢唔好凌晨打嚟吖嘛！我成家畀佢嘈醒晒！你搵一搵Doris，叫佢用email交代返Felix單嘢啦！唔好再凌晨打畀我呀！美國日頭咋，香港天都未光呀！一聽又收線，打返去又冇人聽，再瞓著又打嚟，唔知佢想點！你email同佢講得喇！」
點會唔知Doris想點呀？擺明係以其人之道還治其人之身啦！Doris個衰妹冇我咁仁慈打一打即收線，佢明顯係蓄意叫醒老細屙夜尿，做得好呀！
想問下係咪得我老細咁「特別」，最鍾意趁同事放假走去騷擾人，有冇人嘅上司或者老細都係咁變態？