「我要加人工！最少$1000！知唔知而家啲嘢幾貴呀？淨係我個女每個月啲咩都成千銀，食唔使錢呀？租唔使錢呀？我要加人工！加人工呀！」同事講呢番說話嘅場合，係公司搞嘅Christmas dinner，地點係尖沙咀海港城某酒店，而同事當時嘅狀態就係飲大咗，醉住行上台發酒瘟。
我咁記得佢嘅一字一句係有原因，陣間再講點解，我哋後來仲問過呢位醉咗嘅男同事，究竟佢個女每個月「咩」成千銀係乜嘢意思？佢話係想講Playgroup，不過當時飲大咗講唔到英文……乜醉咗嘅人會唔突然唔識英文㗎咩？Anyway，而家全公司都知佢個女每個月Playgroup要成千銀喇！連新同事都知！
當晚Christmas dinner，呢個男同事係突然衝上個台，事前毫無預警，老細就坐喺台前面最正中嗰張枱，因為我哋大部分人坐後面，完全睇唔到老細嘅表情，不過有見到嘅人就話，當時老細係愕然先嘅，跟住就一路睇住呢場鬧劇一路笑，咁都冇辦法啦！當晚玩到咁大，現場都群情洶湧，仲有同事跟住大叫「加人工」！ 反而有啲高層就黑晒面，仲叫其他同事拉返條「醉酒佬」落台。
當其他人拉呢位男同事落台嘅時候，佢仲係一路高呼「我要加人工！」嗌咗冇十次都應該有八次，場面似足示威叫口號然後畀人拉走，唔知仲以為係搞緊工潮，及後負責擔任MC嗰一男一女Admin就上台講嘢打圓場，不過大家依然笑聲不絕，因為真係太爆喇！
公司有冇秋後算帳？冇喎！因為係Christmas dinner，距離農曆新年唔係好遠，所以過年之前老細已經宣布大家都有人工加，其他人加幾多我當然唔知啦，不過我自己有4位數，醉酒同事好似話加咗$1500，唔知冇呢件事又會唔會加咁多呢？如果真係有直接關係，咁佢都算係捨己為人喇！
或者你會話，而家唔炒，唔代表遲啲唔炒，咁樣落老細面，搞硬你啦！
真係冇！呢件事係6, 7年前喇，要炒都唔會等咁耐啦，真係君子報仇十年未晚咩？而且呢位醉酒同事都升咗職，變咗部門嘅Assistant Manager，早兩年先升，證明咗冇被封殺。
出面啲朋友聽完我講呢件事，都異口同聲話我老細好玩得，嗱！咁就要睇你點睇喇，老細唔止玩得，仲好識玩。我之所以咁記得醉酒同事當年嘅一字一句，係因為當晚Christmas dinner係有請攝影師影相同錄影，因為公司請咗人嚟表演，年年都係咁，慣例會將啲片同埋相擺去內聯網。
醉酒同事當年上台係咁大叫「我要加人工！」嘅精彩片段當然有錄低啦！老細仲叫咗人每年播一次添！因為自從嗰一年之後，公司嘅Christmas dinner同埋annual dinner都會播片，春茗同平時gathering冇播係因為有啲場地唔適合，但只要係去酒樓酒店可以提供播片服務，呢條片就一定會「重現」。
得兩年係例外㗎啫，就係疫情嘅時候，因為當時取消晒呢啲公司活動，以為冇咗兩年就冇咗件事？唔係呀！之後又播返，今年年頭公司食新年飯又播咗一次，喺公司內部已經成為咗一幕經典，就好似嗰啲Meme梗圖一樣。
唔止我哋呢班舊人，所有後來先入嚟做嘅新人，只要有幸出席過公司大型飯局，就一定會睇到呢條片！
醉酒同事話老細有問過佢介唔介意剪咗條片出嚟，又話係純粹搞氣氛，唔鍾意可以唔播，但呢位同事話唔介意，最緊要有人工加。
老實講句，每次播親呢條片之後都真係有人工加，得疫情嗰兩年冇加薪，嗰兩年又咁啱冇搞event冇播，所以大家睇到「我要加人工」條片都會好開心。
有其他同事話老細呢招好毒喎，你落我一次面，我就年年到時到候落返你面，擺到明係記仇，但就用陰濕招數等其他人笑個醉酒同事……
無所謂啦！老細問過當事人，人哋自己都話唔介意，何況咁大個男人，介意會出聲㗎啦！我覺得老細係爛玩啫，又唔係陰濕嘅。