「唔好走啦！做生不如做熟，啱唔啱先？係咪人工方面嘅問題呀？有得傾喎！你再諗諗啦！」作為一個剛入職兩個星期嘅新人，我親眼睇住阿頭挽留隔籬位個同事，雖然有啲不安，不過見到阿頭咁樣放下身段講嘢，又睇得出呢間公司幾愛才喎！
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
辭職嗰位同事叫Jimmy，佢咁樣答阿頭：「唔啦！新工嗰邊應承咗，咁做嘅嘢差唔多，人工又有一段距離，換轉你係我都會走啦，係咪先？」
阿頭：「我明白，但係你冇聽過咩？轉工即係由一隻賊船跳去另一隻賊船，人工多咗唔代表一切㗎喎！呢度做慣做熟，你點知新公司啲人好唔好呀？返工開心都好重要㗎嘛！一陣去到同其他人夾唔到呢？到時咪兩頭唔到岸囉！」
Jimmy：「吓！我份人好膚淺㗎咋，人工多啲我就開心，個新offer比而家多咗15%，你加唔到咁多㗎，學你話齋，我而家唔係由一隻好船跳去一隻賊船，純粹係賊船轉賊船，咁點解唔搏下呢？唔轉又點知同新公司啲人唔夾呢？」
阿頭仲未放棄勸呢位同事留低：「咁你喺度都做咗差唔多4年啦，你做落去一定有得升㗎喎，甘心咩？去新公司又要洗牌重頭嚟過。」
Jimmy：「唔好講呢啲啦，如果我下年唔做，你咪又係話都做咗5年啦，再下年遞信，你又會話都做咗6年啦，咁無限loop㗎喎！」
阿頭：「再唔係咁啦，我keep住封辭職信先，好冇？你諗多兩日，點睇吖！」
Jimmy：「你keep住冇用㗎，我有個email版本已經send咗去人事部。」
阿頭：「使唔使做到咁絕呀？」
Jimmy：「絕乜鬼呀？我resign咋喎！又唔係同你反面，又唔係不滿公司，人望高處，睇錢份上之嘛！」
阿頭苦勸不果，最終頭耷耷行開咗，我即刻向呢位認識唔耐但又就快離開嘅同事送上祝福：「順順利利呀Jimmy！臨走一齊食餐飯。」
Jimmy：「你今日有冇約人吖？我冇帶飯，冇約人就一齊食啦！」
結果當日我哋就兩個人去食lunch，我同Jimmy講好羨慕佢：「阿頭一定好錫你，實係你平時好幫到手啦，佢真係出盡力留你。」
Jimmy：「傻啦！第日你辭職都係一樣，阿頭點都會出盡飲奶力留住你，同幫唔幫到手係冇關係。」
我當時以為係恭維說話，不過諗真啲，自己返工頭幾日都見過隔籬team有人resign，人哋個阿姐又係起勢咁留人，似乎「留人才」真係呢間公司嘅作風喎！
我：「初時我仲驚自己過唔到試用期，而家見到公司咁有人情味，個心都定啲！」
Jimmy一路爬飯一路同我講：「除非你好過份啦，否則呢度唔會炒人，自己resign就大把，如果你唔撈，team head要扣bonus㗎！你估阿頭好想留住我咩！佢為自己個荷包著想啫，咁我新工真係賺多咗吖嘛，我唔使為自己荷包著想呀？」
隻隻字都明，加埋一齊就唔明，好在呢位辭咗職嘅同事肯耐心講解。
原來呢間公司有個 Discretionary Bonus（酌情花紅），每半年發放一次，不過唔係for我哋呢啲小職員，而係部門主管級別先至有。
呢個Discretionary Bonus唔係睇業績，反而係睇個部門有冇人離職，舉個例，我個部門如果呢半年冇人resign，我阿頭就會另外獲得呢份Discretionary Bonus，聽講有成5位數，雖然1萬又係5位數，9萬又係5位數，實收幾多就只有一班部門主管先知，但半年出一次，又唔係叫你追數，只係想你個department減少流失率，點計都著數啦！
我：「唔怪得阿頭咁落力留你啦！原來你走咗佢會跌錢。」
Jimmy：「算數啦！公司兩三年前先有呢個Discretionary Bonus之嘛，咁耐以嚟得人事部同埋IT個部門主管拎過，呢兩個department最穩定，我返咁耐都未見過轉人，不過其他部門主管係拎唔到呢份bonus㗎，走嘅人太多喇，唔好話半年出一次，就算3個月出一次都好窄，做落你就明㗎喇！」
聽Jimmy講，如果部門有人退休，又或者一啲嚴重事故例如屋企有事而辭職，咁嘅情況之下就唔會剝奪部門主管嘅Discretionary Bonus，Jimmy仲話之前曾經有另一個department嘅同事因為老豆中風，所以要辭職留喺屋企一段日子照顧家人，咁就可以唔計，只可惜嗰個部門半年內仍然有另一位同事resign，所以個主管都係拎唔到Discretionary Bonus。
我：「如果個同事話移民之類呢？呢幾年好多人移民㗎嘛！」
Jimmy：「如果因為移民辭職，都唔會派Discretionary Bonus畀所屬部門嘅主管，其實都啱嘅，係咪真移民冇人可以證實，唔通叫個同事交證明文件咩？冇呢個權力啦！但係退休就冇得呃，同埋我相信離職同事都唔會願意老作屋企有事，特登成全個主管拎Discretionary Bonus，辭得職仲幫你講呢啲大話咩！」
呢間公司都幾過癮，竟然有個Discretionary Bonus去刺激部門主管減少下屬離職，不過人哋係咪resign，有時部門主管都好被動，呢個bonus多多少少有要有啲幸運成份先可以攞到。
Jimmy：「我哋公司流失率高，成日出招聘廣告請人，好多人笑我哋長期出job ad，你自己去連登同glassdoor睇下，我哋公司好出名㗎……我指長期請人方面，老細話唔想個brand畀人覺得好惡做，所以就諗咗呢個Discretionary Bonus嘅奇招出嚟留人才，但似乎冇咩幫助，要走嘅同事始終會走。」
咁梗係啦，你想個同事唔走，淨係派Discretionary Bonus畀部門主管托咩！不如將份Discretionary Bonus嘅錢打散落去加其他同事人工仲實際啦！究竟老細個腦係諗乜？
其實有呢個bonus制度，我相信班部門主管做嘢都幾綁手綁腳，下屬有錯都唔敢鬧，容乜易鬧走人會冇咗份bonus㗎！不過細心諗清楚，咁嘅制度下依然keep住有人走，每個部門想半年內冇人辭職都有難度，份工似乎唔易做，睇嚟我真係上咗終極賊船，不過唔諗太多啦，反正都入咗嚟，自己親身感受下先囉，或者好適合我呢🙈（完）
講起辭職，我又諗起《談判專家》系列第4集提到嘅「辭職被針對罰坐廁所門口事件」，有冇朋友仲未睇呢個連載呀？最近投稿人有update喎，大家有冇興趣重溫完再睇新發展？
《談判專家》 1 酒店拒延期殺訂近十萬
https://hkofficedaily.com/?p=21562
《談判專家》 2 前男友騷擾埋舊同事
https://hkofficedaily.com/?p=21567
《談判專家》 3 你搞人同事，我搞返你同事
https://hkofficedaily.com/?p=21579
《談判專家》4 辭職被針對罰坐廁所門口
https://hkofficedaily.com/?p=21584
《談判專家》5 惡同事要求跪低道歉
https://hkofficedaily.com/?p=21589