上個月返份新工，老闆第一日重複咗好多次：「第一個星期你學住嘢先，慢慢嚟！」
我覺得佢幾好人，之後幾日亦強調同事會帶住我，仲話期望我一個星期後可以自己處理工作。
去到1月頭出糧，點解得一萬一千幾嘅？我份糧應該有萬五㗎喎！
問會計部，佢哋叫我搵人事部，咁我去人事部啦，HR話呢個數啱，因為我第一個禮拜係實習身份喎……
點樣實習呀？從來冇人同我講第一個禮拜叫「實習」，而且係冇糧出嘅實習，我返office工㗎，麵包店學徒返工都計糧啦！
見我唔順氣一直拗，個HR直接叫老闆出嚟，估下老闆同我講咩，我簡直唔敢相信自己嘅聽覺。
老闆：「比嘢你學仲要比銀紙你呀？我已經當你一個星期學識，第二個星期開始計糧喇喎！」
終於明點解第一日返工嗰陣，個老闆重重複複講「第一個星期我學住嘢先」，咁即係全香港打工仔都有實習期係唔收人工？
我唔撈！講明會去勞工處同埋搞大件事，最尾佢怕咗我，出埋「實習期」嗰一個星期嘅糧，叫我即走！
放心，你唔講我都即走，但絕對唔會畀你扣一個星期人工當實習囉！真係無法無天，啲勞工法例好似佢自己訂咁。