公司喺疫情嗰段日子採用自然流失方針，即係冇主動炒人，但如果有人辭職，就唔會再請返個人返嚟，有個部門本身係7個人，走咗三個之後得返4個，直至今日仍然維持呢個人數，所以嗰個部門嘅team head嗌晒救命，不過老細堅決唔批budget都冇辦法。
老細唔止節流，仲想開源，公司目前有6個吉位，全部係自然流失之後淨低，老細話想租出去，開價每月$5,000，但一直以嚟都無人問津，原因好簡單啫，香港有好多大大細細嘅Co-working Space，即係共享辦公室，逐日計都係幾嚿水，最平見過每月$1,000，又有Wifi又有pantry，咁邊有人會用$5,000同我老細租個吉位做嘢呀？
點知幾個月前突然有變數，有個朋友Anson向我查問：「Ivan，之前食飯你咪講過，你公司走咗人唔會請返，而家有幾個吉位喺度，老細想租出去嘅，仲有冇呀？」
我：「有，都冇人租，佢開$5,000喎！」
Anson：「不如你問下佢$1,000至$1,500得唔得？反正佢吉咗喺度都創造唔到價值㗎啦！」
我：「實唔肯啦，劈咁多！你有friend想租咩？之前幫老細做過research，出面大把共享空間，一千幾百又有，$5000直頭有私人空間喇！」
Anson：「我想租呀！」
我：「租嚟做咩？唔係迷你倉喎！一張辦公枱咋，你喺公司有海景房啦！定係你幫人問？」
Anson：「其實我第一波疫情嗰陣已經畀公司雞咗（註：雞咗=裁員)，不過唔畀得屋企人同老婆知，我冇坐海景房好耐喇！」
我：「雞咗？第一波疫情到而家都一段時間喇喎，你點呃到佢哋咁耐呀？」
Anson喺電話度笑咗兩聲，明顯有啲尷尬：「疫情嗰段日子好容易瞞天過海，因為我話公司轉work from home，即係home office，所以攞正牌留喺屋企，不過之後復常返，呢個大話已經唔可以延續落去，過往一年幾我就係去嗰啲Co-working Space扮返工，唔係太自在，你明唔明嗰種每日身邊有唔同人穿插嘅感覺？仲要差啲穿煲，因為撞過老婆個friend嘅老公，好彩我勉強兜到，唔好提喇，好驚險。」
原來我呢位朋友已經失業咗幾年，佢之前身居要職，係我哋成班friend之中收入最好嗰位，不過大家男人老狗唔搵對方傾訴就明白啫，連自己老婆都唔講？
Anson：「你知我哋兩公婆不嬲都係同外父外母一齊住啦，兩個老人家見我之前日日喺屋企，佢哋都唔知咩係work from home，上一代淨係覺得你留喺屋企就不務正業，結果我先忍唔住出去租嗰啲共享辦公室。」
我：「唉！仲話係friend，收埋咁多年而家先講，其實係㗎，搵工真係唔容易，我同你年紀一樣唔細，而家先嚟失業係比較難搵嘢做，間間公司都想請後生啦，慢慢搵囉！」
Anson：「你咁講，我覺得好內疚，唔係搵唔到工，我係冇搵工，返工好攰，我冇晒動力呀，之前做過一份project base嘅合約，返咗一個星期就冇做，另外有人介紹兼職，我返咗兩日，人生……好似冇晒目標。」
幾日前睇到一段網絡分享，有個32歲嘅日本人喺討論區話自己失業10年，同時稱自己係「蟄居族」，佢話大學畢業之後一直冇嘢做，仲過住近乎隱居嘅生活，期間做過一啲短期兼職，總之就冇做過任何長工，連嗰啲兼職都唔會做得長。呢位32歲嘅日本「蟄居族」更加表示，大學嘅時候佢好努力讀書，亦有返part-time搵生活費，點知畢業後就突然覺得冇晒目標，唔知為咩而奮鬥，變得終日無所事事。
但Anson嘅例子係有少少唔同，前公司裁佢嘅時候賠咗一大筆錢，據理解有6位數，佢冇明確講有幾多，不過肯定唔係啱啱過6位嗰種6位數。
Anson冇動力再搵工作，將裁員所得嘅賠償拎晒去炒股，佢自言收穫唔可以話好多，但拉勻同佢以前每月賺取嘅人工相差無幾，其實好多年前我已經知道佢份糧大約係7萬蚊一個月，就當佢之後冇再加過，以7萬蚊去做一條界線，如果而家每月靠投資搵得返呢個水平，咁……冇動力再搵正職都好合理嘅。
大把師奶阿叔賺一萬幾千都日日走去股票行好似返工咁啦！更何況Anson以前份工本來就同投資有關，佢係有呢方面嘅知識同技能，再加上Anson失業咁耐從未要求過朋友幫忙，冇叫人幫佢搵工，亦冇問人借錢，我記得上次成班人出嚟食飯，仲係Anson主動埋單請客。
做friend咁耐，Anson第一次叫我幫忙就係呢次，即管返去問下老細。
我用返Anson嘅說話，扮係自己嘅分析：「反正啲位吉咗喺度都創造唔到價值㗎啦！」
老細：「咁又係，一千幾百幫補下都好吖，你班友連飲茶都特別狼，pantry啲茶包每個月要買幾轉，好啦好啦，見出面啲Co-working Space做到咁平又頂爛市，一口價$1,500蚊一個月，你叫個friend盡快租啦！」
結果最終係$1,700成交，點解？因為老細本身叫Anson坐一個好開揚嘅位，但Anson睇中一個最入最隱蔽嘅吉位，老細坐地起價話嗰個位要$2,000，Anson話最盡畀$1,700，佢兩條友真係煩……
不過$1,700蚊，我公司都有Wifi，pantry咖啡同茶任飲，而家佢個位仲咁自閉，除咗我呢個朋友之外包保唔會撞到唔想見嘅人，其實雙贏啦！正常人點會租人哋公司啲吉位坐吖，老細每個月多千零蚊收入，勉強都叫開源，喂！呢$1,700現兜兜畀cash老細，唔使入帳㗎！
大家做咗「哎吔同事」之後，我多咗個飯腳，又多咗個朋友分享下日常事，有次我同老婆鬧交都搵佢呻：「你知我當年好細個結婚啦，佢老豆恐嚇我唔娶佢個女，就報警拉我衰十一吖嘛，諗起都好笑，我咪同老婆講囉，如果嗰陣由得佢老豆報警，坐監一早放返出嚟喇，而家變相坐一世，真係笨柒！」
Anson：「哈哈，好後悔娶咗你老婆？」
我：「講笑啫！兩公婆唔講邊有得笑，日日屙屎食飯瞓覺好悶㗎嘛，點知我老婆就係唔講得笑，嬲咗幾日，喂，係呢？你有冇後悔娶咗你老婆？又要同外父外母住，失業幾年又唔同佢講。」
Anson：「後悔呀，後悔冇一早娶佢囉！其實我想同佢開心見誠講自己失業，但唔成功，每次講到口唇邊又收返，我而家淨錢係多過之前，因為唔使返工，應酬少咗，以前我買一套西裝幾多錢你都知啦，呢幾年我直頭衫都冇買，因為唔需要，每日就係搭車扮返工，嚟咗你呢度連食飯都平咗，嗰陣喺ICC食個晏都好離地㗎嘛…….啲價錢，上年新年我扮有雙糧畀咗老婆double家用，點知佢畀返我，仲額外搭多幾千叫我包大封啲利是畀同事，哈，我都冇同事幾年啦！費事講出嚟佢擔心啦！好在租到你呢度個位，唔使日日出去打游擊。」
後來Anson再解釋點解鍾意租我公司個位，一來個吉位好隱蔽，鍾意睇下個市又得，睇劇又得，如果係Co-working Space私人房平極都要幾千，話晒而家係失業全職投資，慳得就慳，而且我公司啲同事起碼係固定，包保唔會撞到佢老婆識嘅人；二來，Anson話希望自己適應下正常公司嘅環境同氣氛，將來若然真係要出返去搵工，都唔使咁脫節，想慢慢儲返啲動力，至少有啲「哎吔同事」可以say hi say bye正常溝通，其實除咗我之外，公司都有其他人會同Anson傾計㗎！有返少少社交，先可以避免做「蟄居族」。
不過Anson喺我公司都有個花名，叫做「角落生物」，因為有啲人仲係唔知佢做乜，只知佢存在，呢個花名都幾貼切吖！