我入咗間新公司，好多怪人。
首先係個老細，一個60幾歲嘅阿叔，每星期只會見佢返兩三日，而且最多半晝就走，但佢每次返嚟公司就會好大聲播粵劇，你係完全做唔到嘢，試過有同事同客講緊電話，可能嬲得滯，大大聲同老細講：「可唔可以細聲啲呀！」然後老細真係較細聲咗，等到個同事講完電話又開返大聲，問過其他同事點解忍到，佢哋話一個禮拜兩三次冇咩所謂喎！
然後係我Manager，一個40幾歲嘅肥佬，呢條友出色呀！逢落雨就唔返工，留意返，唔係紅雨黑雨，總之落雨佢就唔返，聽講一直以嚟都係咁，甚至已經有共識，初初我唔知吖嘛，有嘢要搵呢位Manager，但食lunch仲未見人，咁我就問個同事，究竟Manager今日返唔返嚟？
「今日落雨吖嘛！」
我：「……即係晏啲返？」
個同事第二句已經躁咗：「都話今日落雨咯！」
之後我終於知道，總之嗰日落雨，無論係微微雨定係大雨，Manager都係唔會返工，老細亦唔會過問。我呢個Manager應該創下好多豐功偉績，所以今時今日先有呢種特權係咪？
另外，同部門有個男同事，每日都孭結他返工，正確嚟講係結他袋，咁人哋夾band唔畀咩！梗係畀啦！但有次行過唔小心撞跌，我當時好驚，爛咗點賠呀？然後呢位男同事自己扶返起個結他袋，同我講冇事。
我：「Sorry sorry，你check下好喎！」
「唔使，裡面冇結他。」
佢隨即拉開個袋畀我睇，裡面全部係一張張揸皺咗嘅報紙，用嚟鞏固結他袋嘅形狀。
我：「點解嘅？」
「Fashion嚟㗎！結他袋用嚟襯衫㗎咋！」
呢期佢轉咗style，間唔中拎滑板，而佢話自己係唔玩滑板，都係fashion……
呢度仲有一個講親嘢都要重複一次嘅同事，因為無論你講咩都好，佢第一時間都會應你：「吓？」所以同佢講嘢好攰，以為佢耳仔有事啦，後來發現只要佢「吓」完，而你唔再重複，其實佢係會答到你，即係嗰句「吓」只係一個習慣。
另外有一個同事就相反，佢係講嘢超級細聲，之前我會叫佢重複講多次，後來發現其他人都係鳩應佢，因為我試過聽唔到，但隔籬位同事又點頭，咁我咪問隔籬位：「你聽到呀？佢講咩呀？」
「唔知呀，求L其應佢得㗎喇，佢講嘢得自己聽到。」
我公司得20個人，數下數下都差唔多一半係好怪，真心想知大家公司有冇啲好怪嘅同事。