我係上年搵到而家呢份工，初時其實好抗拒，記得入職後第一個月我仲周圍send緊CV，諗住有機會就走，更加試過扮病請咗半日假去第二間公司interview，總之就想盡快脫離呢度，心態上只係當呢份工係跳板，同埋費事留喺屋企畀老豆老母煩。
咁抗拒咁唔鍾意，完全因為公司係「耆英社」，我唔係做老人院，不過班同事全部係上晒年紀嘅阿叔阿嬸，平均年齡50+，最後生嗰個reception阿姐都47，我嚟緊5月先至27歲，你想唔想像到有幾格格不入？唔係講笑，喺office真係會聞到浸白花油味，有個阿叔同事日日都搽，佢話搽完好精神喎！
印象中之前唔知連登定高登有人分享過，新入職因為打字快所以畀同事讚，我想講呢份工就係咁，當時係返工第二日，有個阿嬸同事問我：「嘩～你打字唔使睇住鍵盤㗎？」
鍵盤？唔講keyboard講鍵盤都知佢唔係屬於呢個世代，班同事連mouse都唔講，佢哋叫滑鼠……
每次打親字，班阿叔阿嬸就會企喺我後面圍觀，唔知以為我表演緊咩雜技，個感覺好似公園有人捉棋，啲阿伯圍住嚟睇咁款，可唔可以正常少少呀？
咁呢班長者同事平日唔用電腦打字？用，不過佢哋打字就好似螳螂拳咁，用食指去篤個keyboard，而且有幾個同事仲用緊類似手寫板嘅物體，佢哋啲email係打中文㗎！
呢啲都係碎料，仲有好多嘢難以形容，例如我發現呢個office啲叔叔嬸嬸唔識用AirDrop，唔識得開Google Drive丟嘢上去，唔識得用Microsoft Teams或者Zoom嚟開會，總之所有嘢都係最原始，間中會覺得置身於呢個office係時空交錯。
聽老細講，公司因為多咗批比較年輕嘅新客，仲唔知邊度飄咗個鬼佬客埋嚟，所以先至開呢個位請我，其實我老細都係一個70幾歲嘅伯伯。
認真，我英文都好差，interview嗰陣係老細親自見，佢問我識唔識英文？我話識……咁我冇講大話吖，識唔代表勁喎，何況見工你問我識唔識打筋斗我都要話識㗎啦！
點知我答完「識」，老細就已經話請我，完全冇test過或者叫我講兩句，有少少懷疑其他求職者可能謙虛得滯，冇我答得咁肯定。
有次個鬼佬客走上嚟我公司睇sample，老細叫我做翻譯，心諗呢次實穿崩啦！雖然聽得明，或者表達到意思，不過grammar係完全錯晒，你試想像一個初學日文嘅人，識講「我」，識講「香港」，識講「27歲」，但全部僅限單字，唔識得用正確嘅連接詞，我啲英文大概就係咁嘅程度。
好在睇sample嗰日勉強過關，跟住個鬼佬客就同我同老細出去食飯，去咗蘇豪區一間意大利餐廳，我見啲侍應係西人已經心知不妙，然後老細真係「搞事」，佢想嗌個湯，叫我問侍應可唔可以走蔥……
仆街喇！我真係唔知蔥嘅英文係咩？走蔥即係No蔥呀？點講呀？
天無絕人之路，好在個Menu有相咋！我指住張相上面啲蔥，對住個侍應講：「He don’t want this, this green one, no need!」蘇豪啲侍應又特別醒，咁都聽得明，最後真係走咗蔥，老細仲讚我：「醒目！將來個世界係屬於你哋呢啲後生！」
離一離題，有冇發覺你英文錯grammar又或者發音唔正，鬼佬好少challenge你，佢哋真係視語言為溝通工具，明就得㗎喇，反而會笑你會串你嘅通常係香港人，之前有個教英文嘅KOL就係咁，佢平時出post叫人勇於開口講多啲英文，唔好驚錯，但有個明星講英文講得唔好嘅時候，佢就即刻cap條片出嚟開post笑人。
鬼佬客應該意識到我嘅英文係「有限公司」，但佢看破不說破，都正常嘅，人哋做生意啫，冇義務幫你補習英文。
最好笑係老細返到公司周圍同啲阿叔阿嬸同事讚我，話我三文兩語乜都掂，前途無限。
我返呢份工仲有人追（自己講完都覺得尷尬），就係個47歲嘅reception阿姐，有次佢問我有冇女朋友，以為佢想介紹個女畀我啦，點知佢話自己單身，想約我出街睇戲食飯，又曾經問我介唔介意姊弟戀，唔好咁過份得唔得？唔係姊弟戀喎，其實你生得我出㗎！
後來慢慢接受咗公司所有kam嘢，上面嘅描述好似講到好嫌棄，但我其實愈做愈開心，正確嚟講係愈做得耐，我嘅自信心同埋自我形象獲得全面提升。
未搵到呢份工之前，我係畀前公司炒，而且失業咗超過5個月。先講前公司，班舊同事對我唔係好友善，主要係啲山頭文化問題，我長期都畀人鬧，導致後來返呢度成日畀人讚會好唔習慣，以前我做得幾好都會畀人挑剔，而家打字唔睇keyboard都收到讚美。
同埋唔知係咪老一輩嘅人比較重情義，我喺呢度感受到好多人情味，頭先咪講咗我試過扮病請假，去咗第二間公司interview嘅，之後幾個阿叔阿嬸同事不斷噓寒問暖，其中一個阿嬸同事仲煲湯拎返嚟公司請我飲，類似嘅事唔止一次，初初嫌老土，而家先識得欣賞同埋感動。
坦白講我都冇把握會做好耐，不過暫時冇打算轉工，呢度就好似中途補給站，等我可以停一停，抖一抖，或者做下做下，我又會成為呢間公司嘅其中一位叔叔。