已婚男同事頭先好認真同我講：「Candice啲眼神成日都含羞答答，佢應該係暗戀我，而家啲後生女都係鍾意年紀大少少嘅男人，成熟啲吖嘛！你估佢介唔介意我有老婆？不過呢啲嘢各取所需㗎啫！」
我：「你上星期先話Jennifer暗戀你……」
已婚男同事：「係呀！Jennifer又係咁，佢兩個差唔多年紀㗎嘛，都係27, 28咁上下，女仔早熟呀！同齡啲男仔對佢哋嚟講太幼稚，所以有時我都後悔自己太早結婚，男人40幾50歲，對啲廿幾歲嘅女仔嚟講仲好有吸引力。」
我：「你估下呢……Candice同Jennifer暗戀你……佢哋自己知唔知？」
已婚男同事：「咩意思？佢哋應該想我知啦，次次眼神對接完即刻閃開，我係咪要主動撩佢哋講嘢呢？」
佢真係蠢唔係扮，唔係想唔想你知呀！係Candice同Jennifer暗戀你……佢兩個當事人自己知唔知呢單嘢呀！
其實望一個人又即刻閃開，除咗因為你靚仔，仲可能係因為你好猥瑣，我都試過喺街擰轉頭望一個阿叔，當時我就係一路望一路心諗：嘩！點解會有人咁L樣衰嘅？
望你一眼就暗戀你，望多你一眼咪想同你生仔？