有個中咗傳銷毒嘅表姐不嬲好煩膠，次次出嚟食飯都要sell佢啲濕鳩不知名化妝品護膚品，銷售手法仲要係典型嗰種一味踩人，例如話你皮膚好差，唔幫襯佢買product就死㗎喇，總之令人極度反感。
最近一次阿婆大壽，全家出晒酒樓分開幾枱食飯慶祝，今次阿哥帶埋佢個女朋友出嚟，其實佢哋拍咗拖一年左右，耐唔耐會上我哋屋企一齊食飯，不過見咁大班親戚朋友就係第一次。
阿哥37，佢女友都係，始終唔係後生女，所以舉止比較成熟，低調又文靜，但係我同佢係幾好傾，真心鍾意呢個未來大嫂。
家族食飯有新面孔，做傳銷嗰位表姐當然唔會放過機會兜售濕鳩化妝品護膚品啦！其他親戚一早知道咩料，例牌唔會出聲由得佢自吹自擂，簡單嚟講就係X佢都嫌費事，不過表姐今次重點sell阿哥女友，繼續使出踐踏完人再sell傳銷產品嘅招數：「Hello，你係表哥女朋友，唔好怪我直接，因為見你啲皮膚好暗啞，其實女人真係要保養㗎！」
阿哥女友只係禮貌微笑，畀足面啦！但係表姐死唔斷氣：「咁啱我今日拎咗支卸妝出嚟，呢隻免沖洗，個個都話好用，法國牌子嚟㗎！」
「唔使喇，我有自己用開嘅卸妝。」
表姐：「你用開嗰啲點同呢，我呢隻係出面冇得買㗎！因為個品牌唔想浪費錢做宣傳，你知啦，羊毛出自羊身上，佢哋寧願將啲錢投入去做好件產品，我可以畀個優惠價你呀！呢隻超得，就算你有皮膚過敏都冇問題，我個客直情有濕疹，用完係咁讚。」
阿哥女友硬接咗表姐夾硬塞過嚟嘅product，睇一睇個盒上面啲字，然後好冷靜咁問：「你呢隻product邊度做㗎！睇唔到既？」
表姐：「頭先咪講咗係法國牌子囉，你睇下個名，法國名嚟㗎！」
「唔係法國名就係法國做㗎喎，哦，我見到喇，原來印咗喺底，太細隻喇啲字，Made in China喎！」
表姐：「佢Made in China啫，不過總公司喺法國，法國配方，其實嗰啲LV呀，Gucci呀，咪又係外國牌子，但配件全部都係中國造㗎啦！」
阿哥女友完全冇理表姐講乜，繼續研究啲成份：「頭先你話呢隻皮膚過敏同濕疹都用得呀？」
表姐：「係呀，我有個friend濕疹都話好好用，買咗兩箱呀，而家佢直頭係我嘅VIP，係喎，你都可以介紹其他朋友，然後你買又有多啲折，仲有佣分。」
阿哥女友keep住咁淡定：「我諗你要叫佢退返喇，因為濕疹真係唔用得，佢有MIT同埋CMIT呢啲化學成分，唔止會增加皮膚過敏嘅機會，仲可能會留疤，甚至加速皮膚老化。」
表姐個樣開始好困惑：「咩MRT？」
「唔係MRT，係MIT，Methylisothiazolinone，即係甲基異噻唑啉酮，CMIT就係Methylchloroisothiazolinone，甲基氯異噻唑啉酮。」
表姐呆一呆，不忘以笑遮醜：「嘩，咁深嘅。」
「因為我做R&D，呢啲係好基本嘅知識，其實一啲都唔深㗎。」
表姐：「R&D唔係音樂咩？」
「你指R&B？我講緊R&D，D for development，即係Research and development，研究開發。」
跟住個個親戚都讚阿哥女友好勁好專業（除咗傳銷表姐），唔意外啦，所以我一直食花生睇戲，阿哥女友本身就喺一個好出名嘅國際化妝品牌工作，仲要係好高級嗰隻，個brand又高級，佢個職位又高級，人哋啲product用都用唔晒，使用你啲Made in China又扮法國貨嘅不知名卸妝？
亂咁Sell嘢點知撞正專業人士，嗰晚表姐即刻自動收皮，有個阿姨仲同我阿哥講：「次次食飯都要聽佢講傳銷，本來好討厭，不過今晚好爽，下次食飯一定要叫埋你女朋友。」
阿哥女友臨走仲同表姐講：「記得幫你朋友退返貨呀，Methylisothiazolinone同埋Methylchloroisothiazolinone真係唔適合有濕疹嘅人，我驚佢出事會告你同埋你公司呀。」
表姐：「哦。」
哦哦哦哦乜鬼吖，表姐聽完都唔知係乜，搞掂R&D同埋R&B先啦，何況佢話有人買咗兩箱，呢個人都未必存在，吹水想營造件貨好搶手之嘛，呢招同踐踏完人再sell嘢一樣，low啦！