話說公司有個內部system係要輸入密碼，得老細同幾個部門主管，包括我，係有權限可以入去，大約半年前老細鬧個IT：
「你哋真係屎忽鬼嚟㗎喎！密碼又要數字，又要大楷，又要細楷，又要8個字以上，又要有符號，個密碼係防我定係防黑客呀？」
講咁多嘢，原來老細唔記得咗自己個密碼，結果IT就set到password可以任填，而且最少6個字就得喇！怕咗個老細。
後來有次我放大假，老細voice msg我：「喂，我唔記得咗自己個password，入極都錯，你畀你password我吖，而家我喺你個位，IT條友今日又請咗假。」
咁我就覆返佢，keyboard底其實有張memo紙，寫咗login同password，跟住入就得㗎喇！點知老細好快又再voice msg過嚟：「password呀！快啦！」
以為佢搵唔到，我就login連password喺WhatsApp打一次畀佢，老細仲躁過頭先：「你而家係咪玩嘢呀！」
冇玩你呀，我個password係******，唔係要你估，真係6個*呀！然後老細鬧我好人好姐點解要set啲咁嘅密碼？
你係咪傻㗎！話明密碼，我自己鍾意點set就點set啦！係你叫IT set到任何6個位就得，我set做******又做錯啲咩呀！你自己成日唔記得密碼就搵本簿mark低啦！