一早約咗兩個friend噚晚出嚟飲嘢，下晝改掛3號風球嗰陣，我哋三個男人都重複緊幾句說話：
「睇下晏啲落唔落雨啦，落雨就唔出喇。」
「係啦，天氣太差就下次啦！」
「驚飲完嘢冇車走，打風call車又會加價。」
三條麻甩佬都明顯想放飛機，但係又唔想做放飛機嗰個，結果一齊聽天由命。下晝我望住個天幾次，仲好天氣過平時，直至6,7點，依然雨都冇滴，所以最後都係出咗去。
不過我想強調，出到嚟之後其實係開心嘅，唔係唔想見朋友，純粹人大咗之後有一系列好奇怪嘅心理狀態，約朋友嘅時候好興奮好雀躍，到出街當日又唔知點解覺得好攰，有啲唔想出。
仲有幾種奇怪嘅心理狀態會喺我身上出現，其中一樣係對任何事都唔再抱希望，因為怕會失望，所以乜嘢都唔想爭、唔想搶、無所謂。
其次就係會對人有好感，不過好難去鍾意人。
緊接住仲有討厭參與群體活動，間唔中有啲厭世，唔知咁辛苦為乜，另外夜晚唔肯瞓，覺得自己好矯情，聽歌會想喊，因為矯情嘅人無論聽咩歌都會覺得講緊自己🤦🏻♂️
我覺得自己唔識，亦好難去維持一段關係，喺每個地方都會認識到朋友，過去幾間舊公司亦有關係唔錯嘅同事，會玩得好埋，會一齊講下是非，好deep嘅分享一樣有，不過當我離開嗰個地方同埋環境之後，彼此嘅關係就冇晒後續。
唔想聯繫之前嘅人，又好怕認識新嘅人，人哋唔搵我，我通常亦唔會搵人，所有嘅關係都好似階段性一樣。
其實如果唔係要搵食，我相信自己可以匿喺屋企直至海枯石爛。
搞唔清楚以上嘅情況係咪得我一個係咁？定係好多人都有相同問題？