人係睇性格 唔係睇出身─聶瞳

今日返咗以前住嘅屋邨,隔離屋個小朋友已經大個咗好多喇,好在佢仲認得我,仲會叫我哥哥。其實佢最初係叫我叔叔,不過有一次我話請佢食糖,叫叔叔冇得食,叫哥哥先有得食,然後佢就改口叫我哥哥直至而家😂。

嗰陣每日返屋企只要喺門口拎出鎖匙,佢一聽到聲就會衝出嚟,真係想帶女仔返屋企都唔得,好似多咗個保安咁,有時都會覺得煩㗎!某次忍唔住問佢:「做咩你次次都吼住我㗎?」呢個小朋友竟然答:「因為我鍾意你吖嘛!」連佢阿媽聽到都笑,第日大個肯定溝晒啲女。

雖然每次喺門口同佢傾計嘅時間都好短,不過呢位小朋友仍然會把握機會講啲生活逸事我知,例如邊個同學今日喺學校瀨屎呀,阿爸買咗張咩貼紙畀佢呀,好記得有次佢話同媽咪出街,喺街邊見到有人瞓紙皮,個身蓋住報紙,我估小朋友真係會對露宿者產生好奇,正常家長會叫唔好行咁近,又或者叫個仔好好讀書,否則第日就會瞓街,但係呢個小朋友就同我講:「媽咪話,第日要畀心機讀書同埋做嘢,要幫佢哋,等佢哋唔使再冇屋企返。」

當然,每個露宿者都有各自嘅故事,但係佢媽咪當時咁樣講,我認為已經表達得好好。其實點樣教小朋友真係好重要,屋邨長大一樣可以有好品德,人係睇性格,唔係睇出身。

error: