我有個同事勁多口，因為好抽象，我都諗緊點樣解釋畀你，就舉個例，早排我同佢出去見客，傾完嘅時候我同個client講：「落街食支煙囉！」因為呢個客同我好熟，過往次次傾完嘢都會落去對方樓下「呼吸」，但係今次個客就答我：「啱啱戒咗，半個月喇，唔好再引我！」
你話個氣氛幾歡樂！雖然我自己戒唔成啫，聽到對方戒緊煙都會替佢高興，點估到我同事無啦啦爆咗句：「戒咗煙？而家轉咗隊草？」即係你get唔get到我同事玩緊膠？個客呆咗一嘢，跟住好認真咁答：「唔係，我唔隊草，不過真係戒咗煙喇。」咁點呀？咪大家一齊笑打個圓場囉！
仲有一次係同老細開會，你知每個人有時講講下嘢會思考或者窒機㗎嘛，嗰次老細分享緊佢有個friend去美國搞展覽嘅事，講講下有個停頓位：「我有個partner之前去LA，佢一個人揸車出去啦，呀……跟住點講呢……」
聽得出老細係整理緊點樣表達，但係個多口仔同事竟然加把嘴喺旁邊講：「死咗？」
難為老細仲要一路諗嘢一路答返佢：「唔係唔係，我諗緊佢揸車去邊度。」
喂！大哥呀！口多都有個分寸吖！你點會加把嘴話老細個friend死咗呀？
呢位同事成日覺得自己講嘢好風趣幽默，成日攝位喺度搞gag，唔係唔得，咁你都要睇下對住咩人吖！
曾經有另一位男同事又係同大家講緊嘢，有一句講到：「我老婆前兩日……」然後佢枱頭電話響，咁梗係唔講住，聽咗電話先啦，點知個多口仔又喺隔籬幫人駁埋落去：「勾佬？」
好在人哋當時掛住接電話所以聽唔到咋！
好似呢幾個例子咁，一個係客，你就話佢戒煙轉咗隊草，一個係老細，未講完句嘢你就話佢前partner死咗，另一位男同事，你直頭彈句嘢話對方老婆勾佬，未必個個接到你嘅所謂笑點或者爛gag㗎！留返同自己熟嘅朋友先玩吖嘛！
不過我都見證過呢位同事因為口多畀人兇，嗰次落街食lunch，公司樓下唔知發生咩事，好多人圍埋，又有差佬拉起類似封鎖線嗰啲banner，大家咪好奇望下囉，嘩屌！多口仔衝咗去封鎖線前面個軍裝嗰度，劈頭第一句就問人：「伙記！咩料呀？」
個軍裝唔知係咪新仔，竟然傻下傻下答我同事：「有人高空擲物，掉咗個鎖頭落嚟，中咗車頂……」講到一半，另一位睇樣似乎係資深啲嘅軍裝又行埋嚟，指住我同事話：「你咩事㗎？」
我同事唔識死仲要問：「喂！伙記，冇人受傷吖嘛？」
貌似資深嗰位軍裝隨即開我同事波：「伙咩記呀！茶餐廳伙記呀？行開啦！」
然後個多口仔先至施施然行開，join返我哋去食lunch……佢真係不分場合，任何時候都係咁多口。
其實唔止我一個覺得呢位同事多口，有啲人覺得佢搞笑，有啲人就覺得佢唔識大體唔成熟，但係最近發生咗一件事就令我對呢位同事有少少改觀，起碼佢唔係揀人嚟玩。話說上星期去見客，而今次個客就出名「西」，係唔係都要講價壓價先安樂，終於明白咩叫一物治一物，糯米治木蝨。
上到個客度，對方例牌話：「平啲啦我張單咁大！打個6折得唔得呀？我轉頭就confirm畀你喎！」
正常發揮，次次都係咁，而我就次次都會耍大極就算，西還西，始終係客，我都要配合一下，用啲婉轉嘅方式避重就輕。
真係估唔到我個多嘴同事衝出嚟講：「喂林生（個客），你係咪覺得我哋啲貨係賊贓？定係好似啲花花草草咁會自己生出嚟㗎？」同事串完個客之後仲要笑住話：「講笑咋！講笑咋！」
現場見到西客嘅面口真係精彩，竟然識得慚愧，仲要回應我同事：「唔係咁嘅意思……」最終呢個西客都有落單，今朝打嚟加單都冇再壓價，睇嚟佢已經feel到我同事係喪嘅。
都係嗰句啦！講笑又好，搞gag又好，串人都好，真係要分場合同埋睇下對住咩人，你點知幾時會遇到個唔玩得嘅，到時反面、鬧交，又或者自此之後心存芥蒂就好麻煩，太過口沒遮攔遲早闖禍，他日畀人笠個麻包袋打唔好問點解，職場上好多人其實好小器㗎！
